Atualità
16 de mei: l di di museums nce a S. Martin y Urtijëi
USP – Vijites menedes, cunferënzes, juesc y cunzerc uniral ai 16 de mei pità te 44 museums te duta la provinzia de Bulsan. La sesta edizion dl di di museums vën chëst ann tenida sot al moto “Museums per sté deberieda”. Programs speziei pieta per chësc di nce l Museum Ladin a S.Martin y l Museum de Gherdëina a Urtijëi.
44 museums dla provinzia de Bulsan à njenià n program speziel, dantaprima per families. N dumënia ai 16 de mei ne puderà duc i nteressei nia me vijità l avëi dl museums, ma i puderà nce fé pea na vela de ativiteies spezieles.
L Museum Ladin à dedicà l 16 de mei al’armunia de sonns tla cumenanza. Ntan dut l di puderan udëi n film sun l studi "Sciuri, sioloc, y subiote", n proiet dl etnologich de mujiga Paolo Vinati che trata de strumënc de mujiga dla valedes dla Dolomites. Mëndri y granc puderà fé pea n workshop ulache n mpera a fé na pipa ora de scorzes de lën y rames, o coche n possa suné meludies cun ierbes y ciofs. Max Castlunger da S. Martin mustrerà co fé mujiga cun materiai dla natura. Tl Museum ladin puderan ntan l di di museums nce ti cialé ala mostra de fotografies metuda a jì per i 15 ani dl Fotoclub val Badia. L Museum Ladin sarà daviert dala 10 danmesdì nchin la 6 da sëira, l ntreda ie debant.
L Museum de Gherdëina à dedicà l di di museums ala Dolomites. Na nota particulera ti vëniel dat a Secëda che conta la storia dla Tiera tres de vedli lëns o tieres da ega y da tiera che ie mo da scuvierjer sun sasc, sciche per ejëmpl l gran Ichthyosaurus. Per pitli y granc iel unì njenià n quiz sun la fusties misteriëuses dla Dolomites. Te na cunferënza y ancuntedes persuneles puderan nrescì velch de plu sun la scuviertes fates ntëur al Ichthyosaurus. Dala 16.30 uniral tenì la cunferënza tla rujeneda ladina, dala 17.30 per tudësch y talian. L Museum de Gherdëina puderà ai 16 de mei unì vijità debant, daviert saral domesdì dala 14.00 nchin la 19.00.
Cie che pieta nce duc i autri museums dla provinzia de Bulsan ie da udëi sota www.museumstag.info tl internet o tl cudejel dat ora per l’ucajion.
as
