Atualità

Politica | 03.05.2010 | 15:31

Jonta provinziela dl 3 de mei

USP – La Provinzia vënd si azions dla Brennercom, l bon rating testemunieia n’aministrazion efizienta y segurëzes per l daunì, nce sce l bilanz ie unì smendrì vëniel dat ora unfat per sustenì sculeies y studënc. Chisc ie stai i argumënc de majer nteres tratei ncuei (3 mei) dala Jonta provinziela de Bulsan y prejentei ai media.

Azions dla Brennercom

La Jonta provinziela à dat pro de vënder duta si azions dla sozietà Brennercom. Nsci vëniel respetà n nvit dla Comunità Europea che l’aministrazions publiches dëssa dé ju partezipazions a sozieteies de ciamps nia istituzionei. La Provinzia de Bulsan vënd l 42,35% dl’azions dla Brennercom y l lincant unirà scumencià cun n priesc de 1103 euro che fej ora na soma de 21 milion. “Per la Provinzia sautessel nsci unì ora n davani de 7 milion y chësc testemunieia che l ie stat n bon nvestimënt” à sorissà Durnwalder. Dl 2008 fovel bele unì vendù 20% dl’azions y ntlëuta oven abù n davani de 4 milion de euro.

Rating per la Provinzia

Nce sce l ie stat crisa, à esperc da oradecà valutà la gestion finanziera dl’aministrazion provinziela dassënn bën, dajan la tlassificiazion AAA. Chësc livel aut à me giapà Bulsan y Trënt permez a duta l’autra regions dla Talia. “Per nëus ie chësc n recunescimënt de na bona aministrazion sana, che sënt respunsabltà. Chësc uel di segurëza per la firmes che uel mëter su filieles y per i zitadins che à la segurëza de n aministrazion che vede bën” à detlarà l presidënt dla Provinzia. Permez al’autra regions talianes à la Provinzia l prudot ntern lordo (PIL/BIP) plu aut: cun 34.193 euro a persona an ti ultimi doi ani arjont n aumënt de 6,6%.

38,6 milion per sculeies y studënc

Per sustenì sculeies y studënc à la Jonta provinziela dat pro de ndut 38,6 milion de euro. “L ie na marueia che nce sce on tëmps de crisa, ne ons nia messù scurté chësc capitul” à dit Durnwalder. I majeri capituli de chësc fond fej ora l trasport (10 milion) y l stipendium (9,5 milion).

Nsenianc per la scolines

I assessëures ala scola à tenì cont dl’esigënzes dla scolines y ie mopmo stai boni de prugramé l proscimo ann de scola zënza aumenté la cumpëida de nsenianc tla scolines. Per i 745 mëndri scric ite tla scolines ladines saral d’autonn 87 culaburadëures. Tla scolines tudësces iel 11.923 iscrizions y tlo iel unì dat pro 1.306 culaburadëures, ntan che tla scolines talianes iel unì dat pro 490 culaburadëures per 3.634 mëndri. Per l ann de scola che vën puderal cun chësta cumpëides de maestres y assistëntes unì garantì orars che va dala 7.10 da duman nchin la 18.00.

Reforma dla scola auta

La pruposta de lege per la reforma dla scola auta tla provinzia de Bulsan dëssa unì trateda mo dan l instà te Cunsëi provinziel. La Jonta provinziela ulëssa che chësta reforma vënie pruteda inant a na maniera che i genitores possa per tëmp se fé n cheder dla scoles che unirà metudes adum y co che les laurerà deberieda. I assessëures de cumpetënza ie tl lëur de se ancunté cun la categuries nteressedes per pudëi finé la pruposta de lege.

Cunzec turistics

La Jonta provinziela dà me pro n aumënt de liec da afité sce tres n studi vëniel documentà che l ambient suporta nce n tel ngrandimënt de cuantità. I assessëures à dat pro n tel aumënt te trëi luesc: A Latsch puderal unì fat 500 liec nueves y 100 lueges da camping (l chemun ova damandà 1400 liec y 500 lueges). Per Tisens iel unì azetà la dumanda dl chemun de 160 liec nueves y 100 lueges da camping. Per Schnals à la Jonta dat pro 550 liec y 100 lueges da camping (l chemun ova damandà 800 liec y 200 lueges). Dan che l possa unì fat i ngrandimënc muessa i chemuns meter ju criteries a puntin per nia lascé pro speculazions.

Fundazion per l svilup

Per nrescides y svilup fovel unì metù su na fundazion dl’Università de Bulan che dëssa lauré cun fic de n capital de 150 milion de euro. Al mumënt dëssel unì adurvà mez l capital che vën paià de reviers tl fond de rotazion, che fej ora feter 80 milion. La Jonta provinziela à fat ora che la fundazion dëssa riesc scumëncé a fé nvestimënc segures y a chësta maniera pudëi tosc adurvé i fic per si atività de nrescides y svilup.

Assegurazion desgrazia tla Venuesta

A Jonta provinziela nvieia duc chëi che ie tuchei da caji de assegurazion per via dla desgrazia dla ferata tla val Venuesta de se mëter adum te na grupa. N pool de assegurazion juda a purté inant la tratatives plu debota y zënza de majera cumplicazions.

Lege per i migrei

Mo dan la paussa da instà ulëssa la Jonta provinziela purté la pruposta de lege sun i migrei te Cunsëi. L assessëur Bizzo ie tl lëur de lauré ora chësta pruposta che reverda i migrei da ora dl’Europa a defrënza de chiche vën da paejes che fej pert dl’Europa. L unirà scrit dant avisa can che i migrei giapa i sustënies per la familia, per servijes de sanità, per l cuatier, lëur o scola. “L dëssa unì scrì dant avisa tan giut che i muessa bele vester tla provinzia per giapé chisc aiuc y canche chëi de familia possa unì do a viver tlo da nëus. Chësc ie debujën per nia lascé pro speculazions, ma nce per traté chisc caji cun umanità” à dit l presidënt Durnwalder.

Studi dl zënter tlimatich de Prettau

La vedla miniera de Prettau tira adalerch n gran publich per la cura de problems de tré l fla. La Jonta provinziela lascia fé n studi da plu universiteies per avëi na recunescimënt scientifica sun la fazion de cura. “Na tel studi nes vel sciche na garanzia per retlamisé chësc raion y per sustenì a chësta maniera l svilup dla raion” à dit l presidënt dla Provinzia.

Sales da juech

Canche l ruva ite dumandes per autorisazions de sales da juech se damanda l presidënt dla Provinzia n bënsté dai chemuns, ma for inò ruvel ite minonghes di ufizies cumpetënc che ie n contradizion. Per la sales da juech se damanda Durnwalder na lege tlera. “N muessa tò n cunsciderazion la situazion n generel ajache l ie nce truepa ustaries cun automac de juech ulache la jënt smaca ite si scioldi, l ie debujën de na sensibilisazion generela” à dit l presidënt.

Parëies contra la fuera dla ferata

I assessëures provinziei à dat pro de fé n’acurdanza cun la sozietà dla ferata taliana RFI per parëies contra la fuera. I parëis per n custimënt de 9 milion unirà finanziei per 7,2 milion dal RFI y per 1,8 milion dala Provinzia. La dezijion ulà fé su i parëis aldò dla fuera y dla populazion che vif te chisc raions, l scrì ora di lëures y pona lascé fé i parëies ie dut tla mans dla Provinzia.

Sindacac dl personal publich

La Jonta provinziela à respendù a cin dumandes cuncretes che i sindacac dl personal publich ti ova metù dant. La Jonta ie nteresseda a adaté i cuntrac al nflazion y sce chësta ëssa da vester maejra che calculà danora, nce de paië do la defrënzia. La Jonta à nce bel anjenià 39,9 milion per n aumënt ti ani 2009-2010. Per n auter ann an calculà de dé ora 42 milion de plu per duc i dependënc publics (ora de chëi di chemuns). La Jonta ie a una de ji inant cun l model cris ora dai sindacac che la tratatives vën da pert provinziela menedes da n’agenzia. A una iesen nce de baraté cun n autra forma. L presidënt dla Provinzia ie despunibl per n’ancunteda persunela d’ansciuida y d’autonn. I criteries aministratives dëssa unì tratei dal’agenzia metuda su aposta. I assessëures provinziei à nce detlarà de ulëi plu gën rujené diretamënter cun i sindacac y nia de messi ji uni iede tres i media.