Atualità
Finanziamënt nuef di servijes soziei – Theiner: adatà al’esigënzes
USP – La Jonta provinziela à ncuei (3 mei) dat pro na maniera nueva de finanzië i servijes soziei. L unirà tëut n cunsciderazion tant che l ie nchin a mo unì paia ite per persona. “Per l finanziamënt da pert dla Provinzia ne conta nia plu la cumpëida di zitadins dassëula, ma nce l’esigënzes particuleres dl raion” spiega l assessëur provinziel Richard Theiner.
La cumuniteies raioneles y la zità de Bulsan ie la majera istituzions che pieta servijes soziei, dajan ora 155 milion de euro al ann. La Provinzia finanzieia pea cun feter 130 milion de euro, l’autra pert vën dai chemuns y dala persones curedes. Deberieda cun la istituzions patrones di servijes, à l Assessorat provinziel al soziel metù n pe n model de finanziamënt nuef che ie ncuei unì dat pro dala Jonta provinziela. “L sistem ie unì fat sun la fundamënta de la cuota a persona” dij l assessëur provinziel.
L finanziamënt nuef tol n cunsciderazion la cumpëida dla populazion y la grandëza dl raion, ma nce la cumpëida de jënt de tëmp y mutons-jëuni, la cumpëida de tanc che à debujën de cures, tanc che vën curei a cësa, l cumpaniamënt soziopedagogich y l sustëni finanziel soziel. “Raions cun indicatores plu auc giaperà nce na majera cuota per persona” spiega Theiner.
I assessëures provinziei à per l prim iede dat pro standard n cont dla cumpëida de lueges de cura o dl’ëures de cura che muessa unì garantides te n raion. “Chëstes ie normes che muessa unì tenides ite dai servijes y aldò de chëstes unirà nce pità l servisc” dij l assessëur provinziel juntan che a chësta maniera vëniel te duta la provinzia segurà i medemi standard n cont de servijes soziei.
Theiner sorissea che l pëis dla cuota per persona y i standard de prestazion ne ie nia n mesun per paië ora de manco. “Tl 2010 dajerà la Provinzia ora de plu per l soziel, la regulamentazion nueva à l fin de nuzé mo miec i scioldi publics” dij l assessëur. L sistem de finanziamënt nuef unirà metù n drova n var al iede. Nchin tl 2012 uniral adurvà ne regulamentazion transitoria y pona dal 2013 me plu l model nuef.
as
