Atualità
Arge Alp chier fotos y films per l festival dl chino a Salzburg
USP – Na mostra de fotografies, films y cunferënzes sun argumënc alpins prejënta la Comunità di paejes alpins Arge Alp pra l festival dl chino da mont a Salzburg. Fotografs amatoriei y chiche fej filmes per hobby possa mandé ite si lëures al Ufize stampa dla Provinzia de Bulsan, per i lascé udëi a Salzburg.
La Comunità di paejes alpins Arge Alp fajerà pea de nuvëmber y dezëmber de chëst ann l festival dl chino a Salzburg dedicà a argumënc alpins. Da pert dl Arge Alp iel udù dant na mostra de fotos dedicheda a cuntredes da paur te raions da mont y la proiezion de pitli films dedichei ala vita y raions de vita ti paejes dl’Arge Alp. L unirà nce pità cunferënzes sun argumënc che reverda i paejes da mont sciche la jites y l alpinism tl’Elpes urienteles, la ferates tla Dolomites dl Brenta y l alpinism tl’Elpes uzidenteles.
Per chësta scumenciadives vëniel ti paejes dl’Arge Alp cris fotos y films. Chiche fej fotos y films per hobby tla provinzia de Bulsan, y che à nteres a pudëi meter ora si opres, possa les mandé ite al Ufize stampa dla Provinzia de Bulsan (Palaz Widmann, streda Crispi 3) per la preselezion. I filmes muessa unì mandei ite nchin ala fin de mei, la fotos nchin la fin de lugio.
L festival dl chino da mont a Salzburg à n gran inuem danter esperc y ie drët cunesciù a livel nternaziunel. Da plu ani vëniel nce laurà deberieda cun l Filmfestival da mont de Trënt. Pra l 17esim festival a Salzburg uniral danterauter nce prejentà l atlant di dialec che l linguist de Salzburg Hannes Scheutz à fat sun ncëria dl’Arge Alp.
as
