Atualità

Familia | 06.05.2010 | 16:19

Mpià la televijion te cualità HD cun programs nueves

USP – Tla provinzia de Bulsan possen sën udëi programs de televijion ORF1, ORF2 y ZDF te cualità HD. Tla sënta dla Radiotelevijion-Azienda per l Südtirol RAS à l presidënt dla Provinzia Durnwalder ncuei, 6 de mei, mpià la trasmiscion sun tiera de chisc programs a na maniera che n possa i udëi te na mieur’ cualità. L’assessëura Kasslatter Mur à mpià la trasmiscion-RAS de trëi programs nueves da oradecà: ARTE, SRG La1 y 3Sat.

Te uni cësa possen śën udëi de plu programs da d’autri paejes dl’Europa y nsci mparé a cunëscer miec i paejes, populi y rujenedes nce zënza sistem sateliter. „La populazion se adrova n cuntat cun l raion culturel tudësch, l radio y la televijion pieta chësc cuntat“ à sorissà Kasslatter Mur. N culaburazion cun la stazions ORF y ZDF deberieda cun la RAS ie chësc bele mesun dai ani. Śën an fat n var mpurtant n cont dla cualità de trasmiscion per udëi chisc programs mo miec.

La Provinzia de Bulsan ne sparania nia tla cualità dla televijion. La populazion se adrova na funtana culturela da oradecà, che ie śën mo unida arichida cun la stazion svizra „La1“, l prim program da oradecà per talian che vën mandà ora cun l sistem sun tiera. Da nuef iel nce l mandé inant di programs dla stazion tudëscia y franzëusa ARTE y de 3Sat che ie na produzion dla televijions publiches tudësces, austriaches y svizres.

Giapé n cësa programs tla cualità HD zënza l satelit, ie na gran arjonta per la jënt dl Südtirol. Chësc se mustrerà per ejëmpl tla trasmiscion sun ORF de duc i 64 juesc di campionac dl mond de juech al palé. Cun l mandé ora di programs te na miëura ressoluzion (High Definition-TV) possen nce udëi sun i gran formac de televijion te na bona cualità n cont de particuleres y culëures. La dumanda da pert dla populazion do programs te cualità HD ie granda y l proscimo var per l daunì sarà la televijion a trëi dimenscions.

I programs nueves possa al mumënt udëi feter l 80% dla populazion che abina su l'antenes dla RAS. Per udëi „La1“, ARTE y 3Sat muessen a cësa me mpië la funzion per crì programs. Per udëi i programs te cualità HD adroven na box aposta o na televijion HD che tol su l sistem „MPEG4-Standard“.