Atualità
Tunel a Urtijëi da ncuei sarà per ressanamënt ecologich
USP – Ncuei, 10 de mei vëniel tl tunel dl stradon de Gherdëina a Urtijëi scumencià lëures de ressanamënt. Per l prim iede uniral adurvà na maniera ecologica de cumedé ca i parëies dl tunel che tol nce su i gas de descëria. Ntan i lëures, che ie udui dant nchin ala fin de juni, saral mesun passé sun mesa larghëza de streda.
L tunel de Petlin a Urtijëi unirà cumedà ca y giaterà nce na luminazion nueva. “I lëures ie na pert de n majer program de ressanamënt y adatamënt di tuniei ala normes de segurëza dal didancuei” spiega l assessëur Florian Mussner. Ai parëies dl tunel uniral metù su na mauta speziela che ne pea nia tan su l ledam, che manda l linëus de reviers y che tol su i gas de desćëria.
L mplant de luminazion unirà fat cun la tecnica LED. “Cun chësc sistem nuef uniral garantì n miëur linëus y nsci plu segurëza y dal’autra pert uniral nce sparanià strom” spiega l assessëur ala stredes.
I lëures ie udui dant nchin ai 26 de juni. Ntan che l vën laurà puderà l muvimënt de streda mpo passé, se baratan ju n iede per direzion. Dai 12 ai 21 de mei y pona dai 14 ai 16 de juni uniral nce laurà de nuet a na maniera che l tunel a Urtijëi muessa unì sarà dala 9 da sëira nchin la 5.45 da duman. L muvimënt de streda unirà ntan chësta nuetes avisà ora sun na desviazion.
as
