Atualità

Trafich | 11.05.2010 | 12:27

„Life is beautiful“ campania nueva per la segurëza sun streda

USP – La campania nueva per la segurëza sun streda ie n proiet de prevenzion y sensibilisazion do n cunzet generel cun placac sun streda y azions te scola y tl zënter de segurëza provinziel. La campania cun l slogan positif „Life is beautiful“ ie unida prejenteda ncuei, 11 de mei, a Bulsan.

Do “No credit” dal ann passà, à i assessorac provinziei per la mubilità y per l stredes, chëst ann cris ora l slogan positif „Life is beautiful“ – la vita ie bela. Davia che l se trata de n cunzet generel an sun cunsëi de psicologhes ulù adurvé na dizion positiva che, ududa sun ëur de streda, porta la persona a fé culegamënc cun si savëi viadò. De mëndra y majera desgrazies sun streda cumporta n gran duel per la families. “Desgrazies murteles possa nce bele suzeder sce n furnea me a 40 km/h” à sorissà l assessëur Widmann. Dal’autra pert cumporta la desgrazies sun streda tl’Europa uni ann n dann economich de 160 miliardes de euro. Per lauré contra la truepa desgrazies uelen da pert dla Provinzia fé prevenzion mpede straufonghes. L cunzet per la segurëza sun streda tol ite la sensibilisazion tla scoles y cursc tl zënter de segurëza a Pfatten, 124 placac sun la stredes y ntervënc de segurëza sun la stredes. La luminazion y l asfalt sun stredes ie ponc zentrei per l Servisc provinziel per la stredes. “Pudon miuré la cualità dla stredes, ma zënza les fé deventé purtoies de garejeda” à sorissà l diretëur de repartizion Paolo Montagner. Per sensibilisé al mëter plu verda ntan furné sun streda vëniel spendù ite 90.000 euro.

La dizion „Life is beautiful“ ie unida crissa ora tla rujeneda nglëija per ti dé n carater nternaziunel y arjonjer n pue’duc, sibe la jënt da tlo che nce i truep turisć sun streda. Sun i placac à la scrita na gran valuta per dé na comunicazion plu direta y plu tlera.

Tl Finnland à la campanies de sensibilisazion purtà a smendrì de 30% la desgrazies sun streda per i jëuni danter i 18 y 25 ani. Chësc ie nce l fin per la campania tla Provinzia de Bulsan.