Atualità
Pruvedimënc contra la crisa: nuviteies per cooperatives
USP – Per sustenì la cooperatives te tëmps de crisa economica y finanziera, à la Jonta provinziela, inier 10 de mei adatà i criteries de sustëni aldò la pruposta dl assessëur Bizzo. Da moinla puderal unì paià na pert danora di cuntribuc y nce rates de contes parzieles.
L fin che ulon arjonjer cun chësta mudazion ie de ti garantì licuidità ala cooperatives” spiega l assessëur Bizzo. Chësc uelen arjonjer te chëla de paië na pert di cuntribuc bele danora. “Pudon paië nchin a 50 percënt dl cuntribut te chël mumënt che l vën fat la delibra, a chësta maniera ne adrova la cooperatives nia de tò su mprësć per fé nvestimënc” spiega Bizzo. Aldò Manuela Paulmichl, diretëura dl Ufize provinziel per l svilup dla cooperatives, possa la pert danora unì paieda sce l vën fat la dumanda aldò cun leprò la garanzia de banca sun chësta soma.
Da nuef ie nce la puscibltà de paië ora i cuntribuc a rates sce la cooperatives porta dant conc parziei. Nscila possel unì paià ora na pert dl cuntribut bele dan finé defin i lëures. Nce chësc pruvedimënt dëssa judé che la cooperatives ne muessa nia tò su massa de gran credic. L paiamënt a rates possa unì fat pra de majeri nvestimënc o programs de nvestizion trai adum te na sëula dumanda de cuntribut. Chësc ulëssa di per na capitalisazion da scumencé, cumpré mascins o mplanc y custimënc de fit.
Di criteries nueves possa se nuzé cooperatives sozieles, de teles che ie unides a se l dé per ativiteies externes, cooperatives particularmënter inuvatives y de teles che ti dà da lëur a ëiles y jëuni. “L se trata de cooperatives che ne à nia l muet ma n gran valor soziel y che se adrova n aiut” spiega l assessëur.
Nfurmazions sun la manieres nueves de sustëni giaten tl Ufize provinziel per l svilup dla cooperatives (tel. 0471 413795; e-mail: gen@provinz.bz.it; web: www.provinz.bz.it/genossenschaften).
as
