Atualità
Nrescida mostra l bujën de miuré l zënter de S.Crestina
USP – Ala populazion de S. Crestina ti stà a cuer la valorisazion dl zënter dl luech y à fat pea a gran cumpëida la nrescida sun i bujëns, pertes stersces y dëibles dla streda Dursan. La respostes plu tleres dla populazion reverda l bujën de fé n raion da jì a pe ulache la jënt possa se ancunté.
A nrescides de chësta sort respuend de norma da 15 nchin al plu 30% dla populazion. “Passa l 35% di cuestioneres mandei ora a S. Crestina ie ruvei de reviers y chësc desmostra che dut l proiet de valorisazion dl zënter dl luech ie drët sentì dai zitadins” se ncunforta l diretëur dla repartizion Hansi Felder. L Assessorat provinziel per l cumerz ova cris ora S. Crestina sciche un de sies chemuns tla provinzia per muever cun n proiet pilot che à l fin de miuré l’atratività dl zënter y la cualità de vita.
Aldò di resultac dla nrescida, laurei ora dal Studio Giovanelli de Trënt y prejentei ala grupa de lëur, se damanda l 84% dla populazion na revalutazion dla streda Dursan. Danter la prupostes de pruvedimënc à i zitadins dat gran pëis a fé l fonz, lueges per i auti y n raion da jì a pe. Trëi cherc à detlarà de ulëi na limitazion dl muvimënt di auti, almanco per n valgun’ëura. La ustaries tipics, scumenciadives cultureles y de tëmp liede pudëssa miuré l zënter sciche luegia de ancunteda soziela. N cont dl cumpré ite à la nrescida purtà l resultat che trueps va te d’autri chemuns. Autramënter iel per i alimenteres ulache la majera cumpëida va uni di a cumpré ite a S.Crestina. N nchin pra la butëighes ruva la majera pert a pe y n pue’manco cun l’auto. De cunseguënza, nsci la nrescida, ti dà la populazion bën mpurtanza al frabiché lueges ai auti, ma nia cun priorità. Gran pert à nce respundù de ne vester nia ntressà a cumpré na luegia per l auto.
N cont de se nuzé dla vela cumerziela y dla ustaries mostra i resultac dla nrescida che la prima mutivazion ie l ruvé permez saurì. L’identità de S. Crestina ie per la populazion dantaprima carateriseda dala natura y dal turism.
Per l proiet de valorisazion dl zënter dl luech ti uniral śën mo cialà ala posizion da pert dl turism y di fulestieres. La grupa de lëur cun feter 20 reprejentanc di ciamps cumerziei y soziei, deberieda cun l aministrazion de chemun y i esperc dl’università de Trënt fajerà na valutazion de chisc resultac. Mo dan l instà dëssel pona unì cris ora i pruvedimënc da lauré ora ntan l instà.
I resultac dla nrescida plu tl detail ie nce publichei sun la plata internet dl chemun de S. Crestina (www.gemeinde.stchristina.bz.it)
as
