Atualità
Ncuei ie nasciuda la fundazion Dolomites, arpejon mundiela Unesco
USP – Inò n var inant per l’arpejon mundiela Unesco Dolomites: l assessëur Michl Laimer à ncuei (13 mei), deberieda cun reprejentanc dl’autra provinzies sotscrì l cuntrat de costituzion dla fundazion per aministré l’arpejon mundiela Unesco.
L mëter su dla fundazion "Dolomiti – Dolomiten – Dolomites – Dolomitis UNESCO" ie stata na cundizion dl Unesco. La dëssa garantì l svilup y n’aministrazion unitera per l raion spartì sun cin provinzies te chëla che l vën valivà fundamëntes giuridiches y sustenì la culaburazion. La populazion, la istituzions scientifiches y l’aministrazion di raions defendui dëssa unì trai ite de plu.
Sënta giuridica ie Belun. “Tenian cont de n’aministrazion daujin al zitadin, uniral metù su sëntes operatives te uni provinzia, a Bulsan l Ufize per i Parcs naturei” spiega Laimer. Ël sorissea che l ne se muda nia per i chemuns, patrons de grunc y d’autri nteressei, te chëla che la sënta sibe a Belun. “La fundazion ne ie nia na istanza sëuraprò per giapé autorisazions” spiega l assessëur. Istituzion de referimënt ie per nëus daniëura l Ufize provinziel per i parcs naturei a Bulsan y Burnech. Per nvië via n dialog che dura tl tëmp uniral de juni scumencià cun manifestazions de nfurmazion per aministrazions y grupes de zitadins.
Cun la costituzions dla fundazion iel nce unì metù su l cunsëi de aministrazion. De chësc fej pert i assessëures dla cin provinzies Belun, Bulsan, Pordenone, Trënt y Udin. La presidënza vën data inant uni trëi ani a rotazion do orden alfabetich. Do Belun ti spieta chësta ncëria ala Provinzia de Bulsan. Presidënt iel l assessëur belunesc Matteo Toscani, Laimer ie vizepresidënt. I autri organns dla fundazion unirà tosc metui su. “Pudon bele de pro l bilanz de previjion y l program per l 2010, a na maniera che possa unì laurei ora programs strategics de svilup sustenibl y turistich da pudëi purté dant pra la reunion generela dl Unesco de juni 2011” à dit l assessëur provinziel.
Ncuei iel nce unì dat ora n cudejel cun truepa fotos sun l’arpejon mundiela Unesco Dolomites. L cudejel vën dat ora per tudësch, talian y nglëisc, y sarà proscimamënter da giapé tl Ufize provinziel per i parcs naturei a Bulsan, tla streda Ritten 4.
as
Galaria dales fotografies
