Atualità
Trëi diretëures nueves tla scoles ladines
USP – Elisabeth Baur de Urtijëi, Maria Kostner da Bula y Heinrich Videsott de Piculin ie i prims trëi tla graduatoria nueva per la stiera da diretëur tla scoles ladines. La Ntendënza ladina ova scrit ora n cuncors per trëi stieres da diretëur da sëurandé ti proscimi ani.
Da nuef iel che la graduatoria per i diretëures vel sibe per la direzions raioneles dla scoles elementeres y mesanes, che nce per la scoles autes ti luesc ladins. Elisabeth Baur de Urtijëi à venciù la graduatoria arjunjan l plu ponc sibe tl cuncors, che nce per i tituli y l servisc fat ti ani passei. Elisabeth Baur nsënia chimica tla Scola d’ert y tl Istitut tecnich a Urtijëi. Ëila ova studià da apotechera a Bologna. Segonda tla graduatoria ie Maria Kostner da Bula che nsënia tudësch tla scola mesana a Urtijëi. Ëila ova studià pedagogia a Padova. Heinrich (Heinz) Videsott de Piculin ie maester de conc a San Martin de Tor y à fat studi de matematica a Trënt.
I sies candidac che à fat pea l cuncors per chësta graduatoria da diretëur à messù fé doi proves scrites. L ie unì damandà de scrì de na problematica de scola per talian y pona nce per tudësch. Tl terzo di de ejam iel unì fat na prova a usc. La cumiscion fova metuda adum dal retëur de università a Persenon Franz Comploi, l presidënt dl’Academia Eurac Werner Stuflesser y dal’ispetëura per la scoles ladines Rosmarie Crazzolara.
Do avëi fat l ejam iel mo udù dant che i trëi diretëures nueves feje na furmazion speziela de 4 mënsc. Per l ann de scola 2011-12 saral tla direzion raionela de Urtijëi debujën dl prim diretëur nuef.
as
