Atualità
Jonta provinziela dl 17 de mei
USP – L tunel dl Prëner, l cont finel dl bilanz 2009 y l cunzet turistich per l Funes ie stai i argumënc zentrei dla senteda dla Jonta provinziela dl 17 de mei. L presidënt Durnwalder à te cunferënza stampa sotrissà che l muessa unì fat dut l puscibl acioche vënie frabicà l tunel dl Prëner.
Ferata dl Prëner: Provinzia de Bulsan a cë dla cumenanza
La Provinzia de Bulsan pea do dal Bayern la presidënza dla cumenanza de azion per la ferata dl Prëner. Cumpunënc ie sëuraprò l Tirol, Verona y l Trentin. „Per chësta ncëria ulons anjenië n secretariat che ti stà do a dut chël che à da n fé cun l svilup per l miuré la ferata dl Prëner” à dit Durnwalder. L fin ie chël de spusté l muvimënt dala streda sun la ferata per arjonjer a chësta maniera plu cualità de vita per la populazion. A chësta maniera spiega l Presidënt dla Provinzia l bujën de fé dut l puscibl che l tunel dl Prëner y la lines per ti ruvé permez vënie nce frabichedes. “Cun si cumpurtamënt resieia l guviern talian de pierder i scioldi che la Comunità Europea à udù dant per l tunel dl Prëner” à dit Durnwalder, che se damanda che la Talia respeteie i cuntrac nternaziunei cun la CE y cun l’Austria. La Jonta provinziela se mpenierà nce tl daunì a Roma per n finanziamënt arjunjan la cunzescion per l’Autostreda dl Prëner y nce per seguré la finanziamënt prugramà dal cunsëi interministeriel per la programazion economica CIPE.
600 liec nueves te Funes
L Chemun de Funes à te si cunzet per l svilup turistich damandà 1000 liec nueves. La Jonta provinziela nen à dat pro 600 plu 20 lueges da camping. Al chemun ti spieta śën la dezijion sun tanc de chisc liec nueves che possa unì anjeniei tla strutures che ie bele y tanc te de nueves.
Sëuravijion de bilanz 2011
Na sëuravijion dl bilanz per l 2011 ie unida prejenteda dal assessëur Roberto Bizzo. La Jonta provinziela à fat i conc do plu modiei per pudëi ti unì do a chël che se damanda sindacac y la firmes. La dumandes reverda dantaprima la chëuta sun l davani IRPEF, la chëuta regiunela sun l’ativiteies de produzion y la chëuta sun i mesuns de trasport. N cheder plu avisa puderà permò unì fat d’autonn. La Jonta provinziela fej cont che l’entredes calerà de 80 milion de euro. “Chësc manco puderons valivé ora tres spustamënc nternes” à dit Durnwalder. I assessëures fej cont de arjonjer per l 2011 feter la medema soma de bilanz sciche chëst ann.
Cont finel dl bilanz 2009
La Jonta Provinziela à dat pro l cont finel dl bilanz 2009. L ntredes ie states de 5,074 miliarc de euro. Aldò de Durnwalder ie l ativa metuda sun na pert de 2,675 milion de euro y la passiva sun na pert de 2,472 milion. L avanz de aministrazion ie de 162 milion de euro. De chisc scioldi fova 154 milion bele unì ntegrei tl bilanz da chëst ann. “Per i autri 8 milion dl avanz ne se paiel nia fé n bilanz de assesstamënt” à dit Durnwalder.
Tla lege per l cont finel à i assessëures juntà trëi ponc. L Cunsëi provinziel dëssa dé dant n cheder te chël che l pudëssa n cajo unì tëut su credic o sëurandé garanzies. La Provinzia ne à te chësc mumënt nia debic, ma per tò su mprësć o dé garanzies iel debujën de na lege aldò. La segonda cuestion reverda chëutes sota 16,58 euro nia paiedes. Mpede se fé dé chisc scioldi tres suneria, pudëssel da cajo a cajo unì renunzià a chësta pitla somes. L terzo pont reverda i zitadins che paia ite massa tert y che dëssa messé paië na straufonga de 2,5% sce i ie tardives de manco de 30 dis. Sce i ie sëurora de passa 30 dis, dëssel unì fat na straufonga de trëi percënt dla soma.
Azions dla Brennercom
La Provinzia ie patrona de 19.483 azions (43%) dla Brennercom. La Jonta provinziela à dat pro de vënder chësta azions a almanco 1.103 euro. “Nchin ai 14 de juni possa uni un prejenté prupostes” à dit Durnwalder.
Hotel Therme Maran
D’autonn uel la Jonta provinziela mo n iede scrì ora la Therme Maran, chëst iede per 31 milion de euro. “L ultimo iede fovel unì scrì ora na pert dla strutura, chëst iede dëssel n iede unì fat doi sozieteies ora de Therme y hotel, y pona ulons mo n iede pité da cumpré l hotel” à spiegà Durnwalder.
as
