Atualità
Resultac dl’analisa linguistica ai 27 de mei a Urtijëi y 3 de juni a S. Martin
USP - Tla scoles mesanes ladines ie unì fat n’evaluazion linguistica te chëla che l ie unì analisà la cumpetënza dla rujenedes di sculeies dla terza tlasses, la paredlan a sculeies de rujeneda tudëscia y taliana. I resultac laurei ora deberieda cun esperc dl’Università de Bulsan y de Milan unirà prejentei ai 27 de mei a Urtijëi y ai 3 de juni a San Martin de Tor.
L Servisc de evaluazion dla scoles ladines fat na nrescida te defrënta scoles mesanes te Gherdëina y tla Val Badia n cont dla cumpetënza linguistica. L ie unì analisà la proves scrites d’ejam di sculeies de terza tlas che ie unides fates ti ani 2007 nchin 2009. Chisc lëures ie nce unic paredlei cun sculeies de rujeneda tudëscia y taliana d’autra scoles.
L’evaluazion ie unida fata a livel scientifich cun la culaburazion dla pruf.a Rita Franceschini dl Zënter de cumpetënza linguistica dl’Università de Bulsan y l pruf. Pasquale Della Rosa dl’Università Vita-Salute San Raffaele a Milan.
“Do che on bele fat na tel analisa per i sculeies che à finà la scola elementera sons jic inant cun chëi che fina la scola mesana, chësc per pudëi paredlé la cuntinuità tla cumpetënza de rujenedes” spiega Rosmarie Mussner dl Servisc de evaluazion. “I resultac de chësta analisa ie de utl per l urientamënt dl nseniamënt dla rujenedes tla scoles ladines.”
I resultac dl’analisa linguistica de sculeies scoles mesanes unirà prejentei doi iedesc dai prufessurësses d’Università:
n juebia ai 27 de mei
dala 16.45 tl’Aula Magna dla scola elementera de Urtijëi
y n juebia ai 3 de juni
dala 16.30 tl zënter di Destudafuech a San Martin de Tor,
i reprejentanc di media, culaburadëures dla scoles y duc i nteressei i nviei ala prejentazions.
as
