Atualità
Kasslatter Mur a Roma per la reforma dla scola auta, matura prufesciunela y nsenianc
USP – Dal Minister dl’istruzion a Roma à l assessëura Sabina Kasslatter Mur inier (19 mei) pià do l bënsté de pudëi scumencé cun la reforma dla scola auta permò tl ann de scola 2011/12. Tl’ancunteda cun reprejentanc dl Minister iel unì rujenà de co mëter n drova la matura dla scola prufesciunela, n miuramënt dla doi rujenedes tl’università y la furmazion per nsenianc.
La reforma dla scola auta unirà tla Provinzia de Bulsan n ann plu tert permez al auter raion naziunel. L assessëura Kasslatter Mur à spiegà a Roma la rejons de chësc spënjer. La cundizion ie che nce tla Provinzia de Bulsan vëniel tl ann de scola 2014/15 dat ora i diploms dla matura refurmeda. “Ntant iela nsci che chëi che se scrij śën ite ala prima tlas fajerà na scola auta cun la mpustazion nueva” spiega Kasslatter Mur, speran che l proiet de reforma dla scoles vënie bele tratà de setëmber tl Cunsëi provinziel a Bulsan. Per l inviern che vën ulëssen te Jonta Provinziela dé pro la diretives spezifiches cun l plann de destribuzion dla scoles, “aldò de chël che n savrà ulà che vën pitedes ciuna scoles”, jonta l’assessëura.
Tl’ancunteda a Roma à Kasslatter Mur nce rujenà dla ntroduzion dla matura per la scola prufesciunela. I reprejentanc dl Guviern à segurà la culaburazion a svilupé la forma scolastica nueva. “L ie debujën de arjonjer n’acurdanza cun Roma per i cuntenuc da pudëi garantì l cuinto ann nchin al plu tert te trëi ani” spiega l’assessëura provinziela. Argumënt a Roma ie nce stat l plurilinguism tl’università, y la dumanda do na fundamënta plu sterscia per la furmazion di nsenianc. “Per la rujeneda tudëscia y ladina iel debujën dla medema pusciblteies de mparé la rujeneda, sciche per l talian, adurvan leteratura y scienzes dla rujeneda” à dit Kasslatter Mur.
as
