Atualità
Milesc unerea l presidënt da dant Magnago pra si supeltura
USP – Milesc de persones à ncuei (28 mei) dat si ultimo unëur al presidënt provinziel da dant Silvius Magnago. Dal Dom de Bulsan ie l vascel de Magnago unì cumpanià da parënc, prevesc, lies, reprejentanc politics y cumpanies deberieda cun cënc zitadins nchin tla curtina de Oberau ulache l ie unì tenì la rujenedes de ultimo salut.
Na pruzescion longia tres la zità de Bulsan meneda da reprejentanc da duta la pertes dla provinzia y da oradecà à cumpanià l ultimo viac dl presidënt da dant dla Provinzia de Bulsan Silvius Magnago. Do la santa mëssa tl Dom, zelebreda dal vëscul Karl Golser, ie na ciadëina de persones mueta tres duta la zità nchin pra la curtina de Oberau. Te chësta si ultima stazion sun tiera à l’autoriteies tenì si rujenedes de salut.
Danora à l presidënt dla Jonta Provinziela Luis Durnwalder sorissà che tla provinzia ne à mo mei tan de mutons y mutans bradlà per la mort de n pere. „Silvius Magnago ie l pere de nosta autonomia, l pere dl Südtirol modern, na tiera che à tenì l var cun i tëmps, davierta y de bënsté, balanzeda sozialmënter y urienteda al balanz. Magnago ie stat chël che la Südtriol dassova vester: per ël ne fova nia l cunflit y l cunfront i ponc zentrei dla politica, ma l dialogh y ruvé a una; la storia testemunieia che ël ie jit la drëta streda. La politica de Silvius Magnago dëssa vester n ejëmpl per nëus duc“.
Do Durnwalder à l Obmann dla SVP Richard Theiner lecurdà che l ie nosc duvier de jì inant cun chël che Magnago à frabicà su. Per duta la provinzia de Bulsan ie chësc n rie mumënt, ma savon de pudëi se stizé sun l’arpejon de Magnago n cont de pesc y cunvivënza. L Bundeskanzler dl’Austria Werner Faymann à pità na vijion europea tla figura de Magnaro „si opra politica ie recunesciuda sëura la sëides provinzieles, talianes y austriaches; duta l’Europa possa mparé truep da d’ël. Per l Guviern talian ie unì adalerch l secreter dessot Carlo Giovanardi: „Silvius Magnago à tenì l destin dla provinzia cun gran vijion y balanz, prutan chësc raion da n problem a n’ucajion storica da arichimënt per la Talia y l’Austria“. L Vizekanzler Josef Pröll à dedicà si paroles a n zitat de Magnago che ova dit „N ne possa nia avëi dut per duc, y riesc, uni cossa giaten te si tëmp, n toch al iede“.
L presidënt da dant dla Camera di Deputati, Pierferdinando Casini à dit che Magnago ie pert dla storia de si tiera y de dut l secul passà. Ncuei, nscì Casini, saludons na gran persona europea, fajan unëur a si maniera giusta.
L presidënt dl Tirol Günther Platter à lecurdà che dut l Tirol ie tl dulëur per la mort de una de si majera persunaliteies. L assessëur ladin Florian Mussner à metù a cuer che Silvius Magnago ie stat l pere dl’autonomia nce per i ladins y n generel per duc chëi che vif tla provinzia de Bulsan. „Sciche reprejentant de na mendranza ëis fat dant che n possa y muessa purvé a lauré y viver dajan testemunianza per cultura y rujeneda dl’oma.“ L ultima rujeneda ie stata chëla dl ambolt de Bulsan Luigi Spagnolli che à lecurdà che sce ne fossa nia stat Magnago, ne fossa chësta tiera nia chëla che la ie ncuei y nëus ne fassan nia chëi che son. Magnago nes à mustrà la drëta streda, chëla dla pesc, dl’autonomia y dla cunvivënza.
NFURMAZION PER LA REDAZIONS: duta la fotografies dla supeltura de Magnago, te na bona ressoluzion, ie da pudëi desciarië dal adres www.provincia.bz.it/lpa/service/gallery_magnago.asp
as
