Atualità
Cumisser europeich per la regions Hahn duman a Bulsan
USP – Na lingia de ancuntedes iel sun l program de vijita dl cumisser europeich Johannes Hahn, de duman, prim de juni tla provinzia de Bulsan. L cumisser per la politica regiunela sarà pra la cunferënza metuda a jì dal Ufize dl’Euregio a Bulsan sun la politica regiunela dl’Europa y vijiterà pona l cantier dl tunel dl Prëner a Mauls. Per la 11.30 ie udù dant na cunferënza stampa.
La prima ancunteda dl Cumisser Hahn sarà dala 9.30 tl Palais Widmann a Bulsan cun i trëi presidënc provinziei Luis Drunwalder (Bulsan), Günther Platter (Tirol) y Lorenzo Dellai (Trentin). Dopro jirala inant tla sënta dl’EURAC ulache dala 10.00 danmesdì scumëncia na cunferënza metuda a jì dal Ufize dl Euregio a Bulsan, dedicheda ala politica regiunela dl’Europa sota l moto „jì sëura sëides – sustenì la regions“.
Do la cunferënza tl Auditorium dl EURAC (Drususallee 1) davierta a duc i nteressei, iel udù dant na cunferënza stampa de Hahn cun i trëi presidënc provinziei, cun scumenciamënt dala 11.30 tla sala di seminars 2 tl’Eurac.
Proscimo pont sun l program ie pona na vijita dl zënter de sperimentazion Laimburg per udëi n cheder di proiec europeics tl ciamp genetich de pësc y mëiles. L ie nce prugramà na vijita di mplanc cun vedla sortes de mëiles.
L’ultim pont sun l program de vijita dl cumisser Hahn, ie pona l cantier dl tunel dl Prëner a Mauls, udù dant per la 14.30. Itinsom al tunel de culegamënt de 1,8 chilometri uniral prejentà l proiet al Cumissera y ai jurnalisć nteressei. Dala 15.30 iel udù dant che l Cumissser europeich furnerà tl Tirol dl Nord.
as
