Atualità
Jonta provinziela dl 31 de mei
USP – La Jonta provinziela de Bulsan à ncuei (31 de mei) tëut n cunsciderazion la prima nfurmazions sun la manovra dl Guviern a Roma per smëndrì l debit publich. Danter i argumënc de majer nteres iel nce unì rujenà l cunsëi de aministrazion dl autostreda dl Prëner y de na documentazion sun Magnago. Pra i lëures publics uniral dat pëis al adurvé material dla frabiches trates ju.
Manovra finanziera da Roma
L Guviern Talian à cunedì na manovra per smëndrì l debit publich. “Davia che ne on mo nia udù n test ufiziel ne pudons mo nia di truep sun la cunseguënzes per la Provinzia de Bulsan” à detlarà l Presidënt dla Provinzia. Davia che tl’acurdanza de Milan foven bele ruvei a una, ne uel la Jonta provinziela nia mussei paië n segondo iede. “Nëus on bele fat nosc duvier” à dit Drunwalder. Pernan che n arà n test ufiziel sun i pruvedimënc dl Guviern Talian se meteran a una cun Trënt per co se astilé. A livel naziunel iel unì dit de nia auzé l paiamënt di dependënc publics ntan i proscimi trëi ani. Aldò dl Presidënt dla Provinzia ne dëssa chësc nia unì sëurantëut automaticamënter. Canche n savrà velch de plu da Roma uniral a Bulsan tëut la dezijion sce auzé i paiamënc aldò dla nflazion.
Aministrazion dl’autostreda
L cunsëi de aministrazion dl’Autostreda dl Prëner dëssa unì smendrì da 24 a 14 cumpunënc. La Jonta provinziela à numinà n si reprejentant tla persona de Heinrich Huber y à dat pro la pruposta per n statut nuef. Da nuef iel che dlongia n presidënt saral nce n aministradëur cun truepa cumpetënzes. Pra de gran cuestions dëssa l aministradëur tò la dezijions deberieda cun l presidënt. Chësta doi ncëries dëssa aldò dla pruposta dla Jonta baraté a rotazion danter Bulsan y Trënt.
Lecord a Magnago
Na documentazion dëssa lecurdé l’arjontes politiches de Silvius Magnago. La Jonta provinziela à dat la ncëria de crì adum materiai tenian n cunsciderazion la ulentà di parënc. Per l ann de scola che vën ulëssen avëi na mostra che possa unì data inant da scola a scola. Canche n arà l material uniral valutà sce dediché na mostra speziela tl Ciastel de Sigmundskorn o tl Cisatel de Dorf Tirol.
Adurvé material vedl
Canche l vën trat ju de vedla frabiches vëniel ora truep material da mené demez. Mpede ciarië montes de refudam ulëssa la Jonta provinziela che chësc material vedl vënie inò adurvà. Canche l vën scrit ora lëures publics uniral perchël nce damandà tan che n ie boni de adurvé l vedl material.
Mumia Ötzi arpejon mundiela
La Jonta provinziela de Bulsan à finà via l stritoz per l paiamënt de avëi abinà la mumia Ötzi, dajan pro de paië ora 175.000 Euro. Tramedoi pertes paierà nstës la spëises de aucac. Te cunferënza stampa à l Presidënt Durnwalder cunedì che l unirà scumencià la pruzedura per damandé che la mumia Ötzi vënie recunesciuda sciche arpejon culturela mundiela UNESCO.
Cunzet per l nseniamënt de mujiga
La cumpëida dla direzions dla scoles de mujiga dëssa unì smëndrida da 24 a 17. Cun chësta dezijion à la Jonta provinziela nce udù dant n majer paiamënt per la majera ncëria di diretëures. Leprò se damanda i assessëures n cunzet per coordiné miec l nseniamënt de mujiga danter la scoles de mujiga y la scoles. “Dantaprima ulons astilé ora che l vënie fat n lëur dopl” à sorissà l Presidënt dla Provinzia.
Liec per trëi chemuns
Aldò de proiec de svilup turistich à la Jonta provinziela dat pro na majera cumpëida de liec da afité per trëi luesc. Per Innichen iel mpede i 900 liec damandei, unì dat pro 600 liec da fité. A Algund fovel unì damandà 1200 liec, i assessëures provinziei à dat pro 700. L chemun de Welschnofen ova te si cunzet de svilup turistich udù dant 800 liec nueves cun 200 lueges da camping, la Jonta provinziela à dat pro 500 liec cun 100 lueges da camping.
Proiet nternaziunel: Vinolingua
Te na culaburazion nternaziunela uel l proiet Vinolingua svilupé material didatich sun la terminologia dl vin per paures y per la gastronomia, cun leprò nce n strumënt de comunicazion per mëter l vin sun l marcià. La Jonta provinziela à dat pro de fé pea chësc proiet. Nchin ala fin dl 2010 ie la repartizion provinziela per la furmazion prufesciunela per l’agricultura nciarieda de lauré pea te chësc proiet. Partner de chësc proiet ie l’Austria, la Franzia, la Spagna y la Talia cun nuef istituzions, majera pert de carater universiter. L custimënt da pert dl Südtriol ie de 34.510 Euro, cun n gran sustëni dala Comunità Europea a na maniera che la Provinzia de Bulsan paia 7.000 euro.
Zënter de biblioteca a Bulsan
La Jonta provinziela à dat pro l plann de cubatura per n zënter de biblioteca a Bulsan. “L dëssa deventé n zënter per duta trëi grupes de rujeneda tres na culaburazion danter Chemun y Provinzia” à dit Drunwalder. La Jonta à udù dant n patimënt sot a tiera per locai de archiviazion. Aldò di assessëures dëssel unì spendù al plu 67,8 milion mpede 71 milion udui danora. Canche la jonta de Bulsan sarà metuda su uelen fé n ancunteda per cuncretisé la ideies sun chësc zënter de biblioteca.
Museum dal vin nuef
La Jonta provinziela ulëssa ti dé n carater nuef al museum dal vin a Kaltern. Davia che n muessa se n jì dala sënta da śën ova la Provinzia bele cumprà n auter luech a Kaltern. Tla sënta nueva ulëssa nce tò ite pea n’academia dl vin ulache l possa unì fat furmazion y cunvënies. L’idea dla Jonta provinziela fossa chëla de fé n museum do n cunzet modern te na forma drët viva.
Purtoies dai schi
Sun l plann provinziel di purtoies dai schi ne ie i assessëures provinziel mo nia ruvei a una. L pont ie unì spënt ala proscima senteda.
as
