Politica | 01.06.2010 | 17:21

Cumisser EU Hahn a Bulsan per politica regiunela y tunel dl Prëner

USP – „La politica regiunela dl’Europa dëssa tò ite duta la regions europees, l ie na politica de nvestizions y nia de dunfierta“. Chësc ie l pensier che l cumisser dl’Europa per la politica regiunela Johannes Hahn à purtà ncuei (prim de juni) pra si vijita a Bulsan cumpanieda da trëi presidënc provinziei dl’Euregio.

De politica regiunela dl’Europa sota l moto „jì sëura sëides – sustenì la regions“ à l cumisser rujenà tla cunferënza tla sënta dl EURAC a Bulsan. Johannes Hahn, cumisser a Brüssel, à  purtà dant pruspetives dla politica regiunela dl’Europa tl tëmp de programazion finanziera do l 2013 sorissan la mpurtanza de na culaburazion sëura la sëides. „L se purté inant dl’Euregio Tirol-Bulsan-Trënt deberieda a Brüssel mostra l’efizienza y l suzes dl lëur de lobby“ à Hahn detlarà tla cunferënza stampa. La cooperazion dla provinzies fej a na maniera che la paroles di trëi presidënc Luis Durnwalder, Lorenzo Dellai y Günther Platter giate pëis a Brüssel.

N cont dla politica regiunela do l 2013 à Hahn ncuei segurà che la trëi provinzies, danter chëles plu dal muet tl’Europa, ne vënie nia lascedes un na pert. „La politica regiunela dl’Europa muessa tò ite duta la regions europees“ à dit Hahn a Bulsan. Deguna region, nce sce mo n tan rica, ne à nia la garanzia de resté nscila y muessa for inò fé nvestimënc tl svilup. Sce l se trata de nvestizions per l svilup scientifich, de energia da adurvé mo n iede o de armunisazion soziela, pona vën chëstes nce sustenides dala Comunità Europea. Aldò dl cumisser Hahn ons a livel de Europa da tenì ite mesures de stabilità y de chersciuda, tenian cont de tramedoi. A livel europeich iel debujen de sparanië, ma tl medemo mumënt muessen nce fé nvestimënc tl crëscer, sce n uel avëi prugres. „Politica dl crëscer ie politica regiunela“ à dit Hahn.

Sciche proiet de chersciuda à l cumisser europeich nunzià l tunel de basa dl Prëner. „Me cun l frabiché vëniel a se l dé milesc de stieres“ à dit Hahn dan furné de persona a Mauls per ti cialé ai lëures tl tunel de culegamënt. La Comunità Europea se à, aldò de Hahn, bele detlarà per l tunel dl Prëner, l ie me mo cuestion di paejes de fé vares cuncrec. L presidënt dla Provinzia de Bulsan à fat referimënt al pericul per l proiet tres i pruvedimënc per sparanië da pert dl Guviern a Roma. „N se damanda che chëi che uel giapé la cunzescion per l’autostreda dl Prëner, mëter sun na pert scioldi“ à dit Drunwalder. Chësc ie tl nteres de chëla provinzies che à bele paià ite te n fond per l finanziamënt dla scines tres la streda. „Cie che ne ie nia da azeté, ie sce chisc scioldi ti va al’ANAS y nsci ala stredes“ à dit l Presidënt dla Provinzia de Bulsan. Cun Dellai à ël ncuei bele tratà co se muever per arjonjer na mudazion de chësc pont tl pachetl de sparani.

Per l presidënt dla Provinzia de Trënt ie l culegamënt dl Prëner n corridor multifunzionel de streda y scines. „L ie debujen de modiei de finanziamënt, de realisazion y de gestion inuvatives“ à dit Lorenzo Dellai.

Aldò dl presidënt Platter se tratela do trupa acurdanzes y detlarazions per l tunel dl Prëner, śën dla crëta de viers dla politica. „Capësci che te na situazions finanziera critica vëniel pensà do sun la ntensità dl frabiché, ma n mudé plata do che l ie bele unì spendù ite feter doi miliardes de euro, ne azetëssa nia la populazion dl Euregio “ à dit Günther Platter.

as

Galaria dales fotografies

Trëi presidënc provinziei y n cumisser: (d.m.c.) Platter, l cumisser Hahn, Durnwalder y Dellai; foto: USP/Pertl.