Atualità
Cajo de rabia a San Ciascian – dlaveies cun l joler
USP - A San Ciascian iel n merdi sëira unì abinà l cuarto cajo de rabia tla provinzia de Bulsan. Aldò dl servisc provinziel de dutor dal bestiam, se tratela nce chëst iede de na bolp. „Nce sce l ie unì abinà chësc cajo, desmostra la nrescides che l’azion de dlavea à purtà fruc“ nsci l assessëur Hans Berger che à cunedì che l unirà inò lascià ora trapules de dlavea.
Nce chësc cajo de rabia reverda na bolp, che ie unida abineda a San Ciascian. Nce sce l ie l cuarto cajo tla provinzia, ne ie chësc nia l cheder dla situazion generela. „Aldò dla nrescides tla provinzia de Bulsan y ti raions ujins ons abù scialdi manco tieres tuchei dala malatia permez ai mënsc passei“ spiega l assessëur Berger.
Da scumenciamënt dl 2010 iel unì cumpedà 180 caji de rabia tla provinzia de Bulsan y ti raions ujins, de mei iel stat set caji. L calé de caji, desmostra che l’azion de dlavea à abù fazion. Chësc vën nce mustrà su a livel scientifich: „l ie unì demustrà che passa 70% dla bolpes à dlutì na trapula per la dlavea“ spiega l assessëur. Per chësta rejon vën l’azion de dlavea da duman inant pruteda inant. Cun l joler unirà cater-cin dis alalongia smacà ju trapules de dlavea te raions nueves. Sën che la nëif ie nce dlegheda plu al’auta possel unì smacà ju trapules de dlavea nchin a 2300 de autëza.
Do chësta azion ie pruibì jì a ciacia y jì a spaz cun cians nia tachei. La persones ne dëssa nia tuché la trapules; nsci vëniel fat al savëi dal Servisc provinziel de dutores dal bestiam.
as
