Atualità
Assessëur Berger anconta l Minister Galan a Roma
USP – Per la prima ancunteda cun l minister al’agricoltura nuef Giancarlo Galan, furnerà l assessëur provinziel Hans Berger duman (8 juni) a Roma. Argumënt zentrel danter i doi respunsabli per l lëur da paur sarà i organismes mudei geneticamënter.
Do diesc ani de presidënt dla region Veneto, ie Galan de auril unì numinà minister nuef per l’agricoltura a Roma. Śën se ancontel l prim iede cun i aministradëures regiunei y dla provinzies autonomes.
Da pont de ududa dla Provinzia de Bulsan saral dantaprima nteressant a rujené di programs europeics per l svilup di raions ora de zità. “Truepa regions Se stënta a purté inant si programs y resieia de pierder i scioldi da Brüssel” dij Berger, sorissan che chësc festide ne reverda nia tan la Provinzia de Bulsan.
De majera mpurtanza sarà pona de se udëi ora la streda per chël che reverda organismes mudei geneticamënter. “Da Brüssel minons de capì che la Comunità Europea uel ti lascé ai paejes la dezijion de pruibì o lascé pro sumënza mudeda geneticamënter. Per la Talia ulëssa chësc di che la cumpetënza messëssa unì data inant diretamënter ala regions” spiega Berger che te chësc argumënt ie cuordinadëur de ntresc per la regions.
as
