Atualità
Ai 14 de juni ejams tla scoles mesanes
USP – N lunesc ai 14 de juni mët man i ejams dla scoles mesanes. Tla valedes ladines iel 248 sculeies che fajerà de ndut sies proves per finé via la scola mesana. Da nuef iel chëst ann che l ejam nstës giapa n majer pëis permez ala valutazions ntan l ann de scola. Per l prim iede uniral nce sëurandat na zertificazion dla cumpetënzes.
Tla val Badia y te Gherdëina scumëncia i ejams dla terza tlas mesana cun na prova scrita per ladin. I sculeies muessa dal lunesc al vënderdi, te cin dis scrì cin proves. Do l tema per ladin, vën chël per tudësch y pona per talian. Cunescënzes y culegamënc spezifics se damanderà la prova naziunela, te chëla che i sculeies messerà respuender a dumandes de conc y de talian. La cuinta prova scrita ie pona de conc. I ejam a usc scumencerà la sada y jirà inant aldò dla cumpëides de candidac te uni scola.
Da nuef permez ai ani passei iel che chëst ann puderà nce unì sëurandata la lauda a chëi che arjonj la valutazion plu auta dl 10. Dut l sistem de valutazion dl’ejam ie unì adatà y de cunseguënza giapa l ejam nstës na majera mpurtanza permez ala valutazions ntan l ann de scola. “Per la valutazion finela uniral fat la media dla sies proves de ejam plu la nota de amiscion che vën a se l dé dala media de duta la valutazions dl segondo semester” spiega l’ispetëura Rosmarie Crazzolara.
I sculeies che passa l ejam giaperà, deberieda cun l diplom, na zertificazion cun na descrizion dla cumpetënzes arjontes. “L se trata de cumpetënzes scrites dant dala ndicazions provinzieles y che tën cont de prupostes y svilups tl mond dla scola a livel de Europa” nsci l ispetëura ala scoles ladines. Na tel zertificazion giaperà chëst ann nce per l prim iede chëi che fina i cin ani de scola elementera. “La zertificazion à la funzion de nfurmé miec l sculé y si familia de chël che l ie stat bon de arjonjer te scola y de judé inant l sculé sun si troi persunel dl mparé” spiega l assessëur ladin Florian Mussner.
Cun de ndut 248 candidac tla doi valedes ladines dla Provinzia de Bulsan iel chëst ann 24 sculeies de manco permez al ann passà, che fova stat n ann de ezezion. Tla doi scoles mesanes Gherdëina iel na cumpëida de 122 y tal Val Badia iel tla trëi scoles mesanes 126 candidac.
as
