Atualità
Laûrs de prescia sön trëi punc dla Val Badia
USP – Aladô de analises dl Sorvisc provinzial por les strades val debojëgn de comedé atira le punt a Pidrô. I laûrs dess scomencè tosc por rové ciamò dan la sajun da d’isté. Ai pröms de messè él odü danfora da comedé ince le punt sön Ciaulunch y a La Ila.
Por garantì plü segurëza sön chisc trëi punć critics sön la strada dla Val Badia gnaràl fat danü le ur de punt y i tlandri. “Chisc laûrs mëss gnì fać atira, i ne podun nia aspetè ćina do la sajun da d’isté por la segurëza de nosta jënt y de düć chi che passa chilò a pé y cun l’auto” spliga l’assessur Florian Mussner. Tratan la sajun él tan n gran movimënt che an ne n’ô nia laurs y inscö fà la strada plü strënta.
Al vëgn odü danfora de scomencè cun i laûrs sön le punt a Pidrô, al km 18,6, por i 10 de jügn . Naôta gnaràl fat la pert dessura che an arata de rové por la fin de messè, y ai pröms de setëmber metaràn man cun la pert dessot. Chisc laûrs ti é gnüs surandà ala firma Goller de Suc. Ai pröms de messè metaràn man spo cun i laûrs pro le punt sön Ćiaulunch y a La Ila. Por i laûrs sön chisc trëi punć à l’Assessorat por i laûrs publics odü danfora n investimënt de 400.000 euro a bëgn dla segurëza.
as
