Atualità
Interreg Talia-Svizra: „puent de 700 chilometer“
USP – Ambient, se deriejer sun l marcià y cualità de vita: chisc ie trëi ciamps de atività dla program Interreg Talia-Svizra, che dëssa sustenì la culaburazion sëura la sëides. Ai 10 de juni iel tl ciastel Maretsch unì trat bilanz cun l assessëur Florian Mussner n cont dla realisazion dl program.
Feter 92 milion de euro iel a desposizion danter l 2007 y l 2013 per sustenì proiec ti raions de cunfin danter la Talia y la Svizra. Passa 68 milion de euro vën dala Comuinità europea. “L program Interreg danter la Talia y la Svizra ie n puent de passa 700 chilometer, che cunlieia cultura, tradizion, furmazion, inuvazion, tueda, turism, agricultura y soziel de chisc doi paejes” à sorissà l assessëur Mussner. Chësc puent, nsci Mussner, ie na luegia de barat de proiec y ideies per dé plu forza ala singula regions y tl medem tëmp nce plu forza ai culegamënc.
L barata sëura la sëides ne dëssa nia purté a n se semië danter la regions. La Comunità Europea sustën la varietà. “Per chësta rejon tën l’Europa tan sun l svilup regiunel. L uniformism purtëssa me a somëter la cultures y la tradizions“ à dit Mussner.
Tl cunsëi ie unì cialà do tan inant che n ie cun la realisazion dl program. Al mumënt iesen tl lëur de cialé do a feter 80 proiec che ie unì scric ora tla segonda pert. Per chësta segonda pert iel 19 milion de euro a desposizion, permez ai 32,5 milion che fova unì scric ora l prim iede.
Sies proiec che fova unic azetei reverda la provinzia de Bulsan y i Grijons. Danter chisc iel n sistem de nfurmazion per l’eghes, l culegamënt di troies de pelegrinasc de San Iacun o la ricualificazion di raions turistics dl Reschen y Samnaun.
as
