Atualità
Paejes Arge-Alp contra de majeri camions
USP – Contra l lascé pro di majeri camions nueves, tlamei Gigaliner: chëst ie la posizion di presidënc di paejes Arge-Alp. Te na ressoluzion data pro ncuei (18 juni) a Eppan, à i aministradëures di paejes mustrà su problems che unissa a se l dé n cont de segurëza sun streda, nfrastrutures y mpaziamënt dl ambient, sce vën lascei pro chisc gran camions.
Al mumënt possa tl’Europa me furné camions nchin a 18,75 metri de lunghëza che pëisa nchin al plu 40 tones, ma l vën bele fat proves cun camions passa 25 metri lonc y 60 tones. Chisc camions dëssa purté a se nuzé miec dl trasport de marcanzia sun streda y smëndrì l muvimënt. „Na tel argumentazion ne pudons nia azeté“ à dit l presidënt dla provinzia Durnwalder. I paejes dl Arge-Alp mostra su na lingia de problems sciche l lerch sun streda, la ncrujedes o rundei. „Chisc problems deventëssa ti raions da mont mo scialdi majeri ajache nosta stredes ie n gran pert strëntes y l adatamënt ai majeri camions cumpurtëssa de gran custimënc“ nsci Durnwalder che à spiegà che n tel custimënt ne fossa nia n relazion cun l prufit.
L Arge-Alp fej nce referimënt a n se nuzé ora de mesura dla nfrastrutures de streda. Sce l pëis per roda aumënta de 0,75 tones, cumporta chësc 75% majer pëis sun la fundamëntes de streda, nsci la ressoluzion dl Arge-Alp. La cunseguënza fossa che l asfalt, i puenc y la njinies de segurëza se cunsumëssa scialdi plu aslune.
I majeri camions purtëssa, aldò dl Arge-Alp a n problem paradox. Do n studi a livel de Europa, purtëssa l lascé pro de chisc gran camions a n aumënt dl trasport sun streda a dann dl trasport cun la ferata. „Na politica che tën cont dla cundizions ti raions da mont muessa a uni maniera se tò dant de spusté l plu che la va l trasport sun mesuns che danejea manco l ambient“, nsci tla ressoluzion.
La cuntlujion ie che i paejes dl Arge-Alp uel se fé inant tla Comunità Europea y pra i guviernesc naziunei a na maniera che l vën mantenì la regules da śën n cont dla mesures di camions che passa la sëides de stat y che l vën lascià vester i majeri camions tlamei Gigaliner.
as
