Politica | 21.06.2010 | 14:46

Jonta provinziela: lerch da jì a pe dlongia i purtoies

USP – La Jonta provinziela à adatà l plann provinziel di purtoies n cont de chëi che va a pe, caschi y servitù sun puscions. Do la senteda da ncuei (21 juni) à l presidënt prejentà la posizion n cont dla tofles di troies da mont, svilup y tueda, y l sciaudamënt per l spedel de Bulsan.

Adatamënc al plann di purtoies

“I purtoies dai schi ie de prinzip per chëi che va cun i schi, ma nce chëi che uel jì a pe dëssa giapé si lerch da na pert su” nsci ie la vijion dla Jonta provinziela acioche la jënt possa nce jì su per i purtoies. Mpurtant, nsci Durnwalder, che la lerch per chëi che va a pe sibe marcheda. Cun delibra de Jonta provinziela dëssel unì metù l orar canche l possa unì fat la manutenzion di purtoies, ntan chisc lëures ne possen pona nia jì a pe. L’ublianza de tò l casco resta per jëuni nchin a 14 ani. A categureis spezifiches sëura i 14 ani, sciche per ejëmpl maestri de schi, possa la Jonta provinziela scrì dant de tò l casco. Ti raporc danter pratons di grunc y mprenditëures dai lifc à i assessëures provinziei udù dant n pruvedimënt per ruvé a una zënza jì dan suneria. La servitù per purtoies dai schi ne possa nia avëi na limitazion de tëmp.

Rujenedes sun la tofles da mont

La Jonta provinziela à tratà la lëtra dl minister ala regions Raffaele Fitto che se damanda mo chësc mëns na soluzion dla problematica dla rujenedes cun la tofles di troies da mont. L presidënt Durnwalder à stlarì che chësta cuestion ie de cumpetënza provinziela y che l uel vester bona ulentà da tramedoi pertes. La va de abiné na forma che respeteie l pensé europeich y deguni ne possa sfurzé su na forma che vede contra valores storics. La Jonta provinziela lecorda si vedla posizion scrijan na lëtra la lia da mont taliana CAI y la lia tudëscia AVS. “Sce la tofles vën fates cun scioldi publics o sce les ie sun puscion publica, muesseles vester te doi rujenedes” nsci l Presidënt dla provinzia che a spiegà che do si minonga dëssel unì scrì te doi rujenedes duc chëi inuemes che ie purtei ite tl cataster spiegazions sciche per ejëmpl: streda, troi, plaza, direzion per.. y nsci inant. Inuemes tramandei storicamënter che ne à nia na traduzion recunesciuda tl cataster dëssa resté te si forma uriginela. La Jonta provinziela ulëssa nce audi la minonga dla doi lies da mont y aspieta mo chëst ena i resultac de n analisa de 3000 tofles. Aldò de Durnwalder dëssa la lëtra dl minister nce vester na sburdla al Cunsëi provinziel che l se tole su de chësc problem, che l ne vënie nia sburdlà ora ma che n ebe l snait de ti jì permez. Te caji melsegures dëssen, nsci Durnwalder, se tenì ala ulentà dla populazion che viv te chël raion.

Park de inuvazion TIS

La Jonta provinziela à nciarià l architet Claudio Lucchin de Bulsan y si grupa nglëija de lauré ora l proiet esecutif per l parch de inuvazion TIS a Bulsan Sud. Te chësc gran parch iel udù dant na cubatura de 160.000 metri cubich per istituzions publics y la medema cubatura da dé n fit a privac. L custimënt udù danora ie de feter 100 milion de euro.

Pesć per svilup y tueda

La Jonta provinziela à dat pro n pest per l daunì a cin categuries de svilup y tueda. Te na majera manifestazion, bonamënter tl Kursaal de Maran, dëssa chisc proiec unì prejentei y premiei. La categuries ududes dant ie l marketing y l carater nternaziunel, l svilup y tueda, energia y ambient, economia y pona mo furmazion, cultura y media.

Scola auta da sëira

La Jonta provinziela à dat pro de pité nce per l ann de scola che vën la puscibltà de na scola da sëira per fé do la matura. Chësc servisc ie pensà per nteressei sëura i 17 ani y vën a se l dé sce se scrij ite almanco 12 nteressei per scola. L ann passà iel stat de ndut 275 sculeies per chëi che la Provinzia à spendù ite 1,1 milion de euro. Per i sculeies costa la scola da sëira 4364 euro al ann. Nteressei possa mo se scrì te nchin d’instà.

Nvestimënc per l spedel

La Jonta provinziela uel che l spedel de Bulsan posse adurvé l ciaut dl furnel dal refudam a Bulsan Sud. Per chësta rejon iel debujën de fé la roles de culegamënt danter la doi strutures. La nfrastrutures publics per l toch nuef dl spedel dëssa unì fates dala Provinzia. L custimënt de feter 12 milion de euro muessa unì ntegrà tla somes bele ududes dant. Nchin tl 2022 fej la Jonta provinziela cont de nvestimënc de na miliarda de euro per i spedei tla provinzia. 648 milion ie destinei per l spedel de Bulsan: chëst ann an udù dant nvestimënc de 115 milion.

as

Galaria dales fotografies

La Jonta provinziela de Bulsan;