Atualità

Frabiché | 23.06.2010 | 09:27

Prim sas per l zënter de prutezion zevila a Persenon

USP – A Persenon vëniel fat n zënter per la grupes de prim aiut dla Crëusc Blancia, Crëusc Cuecena, Judacrëp y prim aiut tl’ega. L presidënt dla provinzia Durnwalder y l assessëur ai lëures publics Mussner à ai 22 de juni metù ju l prim sas per frabiché su chësc zënter. La strutura de 24.227 metri cubich cun n custimënt de 9,7 milion de euro deventerà na luegia per se nuzé de sinergies danter la grupes de prim aiut y per sparanië ti custimënc.

“Nsci sciche la grupes de prim lëura deberieda te n ntervënt, nsci dësseles nce lauré deberieda sota l medem tët, ajache si fin ie chël de ti judé a persones che ie tl bujën” nsci à l assessëur Florian Mussner metù a cuer l fin dla strutura a Persenon. Nce da pert de Luis Durnwalder iel unì sorissa che l ie debujën de abiné soluzion do n spirt europeich, de lauré deberieda per vester mo plu efetives ti ntervënc y de no se spartì su do grupes de rujeneda. La strutura dlongia l spedel de Persenon ie unida proieteda per n custimënt de passa nuef milion de euro. Aldò dé Mussner y Durnwalder, na bona nvestizion.

I doi cumëmbri dla Jonta provinziela à pra la zeremonia dl prim sas sorissà l servisc de gran valor di ulenteres. Rengrazian duc chëi che se da ca te chësc ciamp ai nce lecurdà che la provinzia de Bulsan ie danora n cont de prutezion zevila.

“Grupes de prim aiut adrova strutures adatedes per la furmazion, per la mascins, i auti y la coordinazion” à dit l assessëur y presidënt dla provinzia.

Aldò dl assessëur Mussner fejen cont de pudëi bele adurvé la strutura tl 2012. La strutura vën frabicheda sun trëi pertes y piterà locai de aministrazion, majons y locai ulache i culaburadëures possa sté deberieda. Per i auti de prim aiut saral 31 lueges te garasc cun nce n mplant da lavé i auti. Leprò ruva mo n local da fé cursc y n ufize cun local radio. Sota tiera y dan cësa uniral fat 183 lueges per i auti di culaburadëures de prim aiut y dl raion saniter. L zënter de prutezion zevila vën frabicà dala firma Plattner Bau, l „Team Werkstadt Brixen“ mëina i lëures. Domenico Cramarossa ie respunsabl de frabiché la strutura proieteda da Paolo Bellenzier y Josef March.