Atualità
Museum Ladin pieta cultura, natura y rujeneda ladina per l instà
USP – Ntan l instà pieta l Museum Ladin a San Martin de Tor n program culturel cun cater avenimënc al’ena: l lunesc ie dedicà ala rujeneda ladina, merdi la vijita dla geologia dla Dolomites, mierculdi l tour de natura y cultura, la juebia ie dedicheda ala familia tl museum.
Nteressei ala rujeneda ladina possa uni lunesc fé pea n curs de 90 menuc per ti ruvé plu daujin. Chësc vën danter l 12 de lugio y 30 de agost, pità uni lunesc dala 10.30. Cun juesc y l rujené puderà nteressei mparé a cunëscer pertes ntressantes de storia y cultura dla valedes dla Dolomites.
Uni merdi de lugio y agost prejenterà dala 10 danmesdì n geologh l unì a se l dé dla Dolomites. Danmesdì uniral tl Museum Ladin fat na prejentazion multimediela cun analisa dl crëp y domesdì uniral fat na jita tl parch naturel Puez Odles per ti cialé a velch dla plu bela formazions geologiches dla Dolomites.
Nchin ai 8 de setëmber pueran uni mierculdi fé n tour dedicà a natura y cultura tla Dolomites per mparé a cunëscer la particulariteies dla jënt y dla montes. Dala 10 danmesdì iel udù dant na vijita dl ciastel, dala 14.30 na jita tla Val di Murins per ti cialé ai 8 muris cumedei ca.
De lugio y agost vën la juebia tl Museum Ladin dedicheda ala familia. Cumpaniadëures purterà dant lijëndes dla Dolomites ai mëndri fajan nce juesc a ativiteies adatedes. Te chësc tëmp possa i genitores vijité l Museum. Per fé pea chësta ativiteies iel debujën de se nuté su al 0474 524020.
L Museum Ladin Ciastel de Tor ie daviert dal merdi ala sada dal 10 nchin la 18 y de dumënia dala 14 ala 18. Me de lugio y agost vëniel nce giaurì de lunesc. Nfurmazions sëuraprò giaten nce cherdan su l 0474 524020 o tres la plata web www.museumladin.it
as
