Atualità
A Urtijëi l tunel plu inuvatif dla Talia
USP – A Urtijëi iel ncuei (26 juni) unì prejentà co che n possa ressané n tunel cun tecniches inuvatives per pité plu segurëza, respet dl ambient, sparanian energia y tl mantenimënt. L assessëur Florian Mussner à pra la vijita di lëures finei tl tunel de Petlin a Urtijëi prejentà l ressanamënt plu inuvativ dla Talia.
I lëures tl tunel a Urtijëi ie unì fai do n proiet pilot, cun tecniches adurvedes l prim iede tla Talia. “L fej legrëza y dà nce sudesfazion a mustré su che nce tl ciamp dla stredes vëniel svilupà manieres de lëur inuvatives per la segurëza, sparanië custimënt y respeté l ambient” à dit l assessëur Florian Mussner.
Tl tunel a Urtijëi iede iel unì tëut demez la mauta smauteda dedite ora cun n sistem de ega a prescion. L revëut dl tunel ie pona unì smautà ora da nuef cun na mauta speziela de culëur blanch. Lessù iel mo unì straicà na sort de forba inuvativa che ne tlopa nia tan su l ledam, che refleteia la lum y che tlopa su l gas di auti.
N’autra nuvità ie la luminazion nueva fata do la norma UNI 11095. Sëuraprò a sensores per l linëus iel unì anjenià na luminazion LED che sparania strom y luna de plu. La defrënza permez a d’autri tuniei luminei cun la tecnica LED ie che tl tunel de Petlin iel nce unì fat la luminazion plu sterscia orainsom cun chësta tecnica inuvativa. L vantaje dla luminazion LED ie dantaprima che la lumes tën plu giut, na regulazion plu scëmpla, n majer linëus y de cunseguënza adroven manco lumes y manco energia.
La terza nuvità prejenteda a Urtijëi reverda l asfalt linëus cun na miëura reflezion la lum. L fonz linëus y i parëis blanc deberieda cun la luminazion plu sterscia porta pro a plu linëus a furné tres tunel y nsci ala segurëza sun streda.
Dut adum porta l ressanamënt de n tunel cun chësta tecniches scunanza di parëis de peton, n mënder cunsum de energia per la luminazion, manco lëur de mantenimënt y manco mpaziamënt dl’aria ajache l gas di auti vën tlupà su dai parëies. L ressanamënt dl tunel de Petlin, che mesura 152 metri à custà 352.000 euro. L custimënt di lëures inuvatives à sëurantëut la firma SCT de Brescia che à realisà l proiet pilot. Chësc lëur ëssa do priejes de marcià scenó custà 534.800 euro, chël uel di che l Assessorat à te chësc cajo sparanià feter l 34%.
Tla provinzia de Bulsan ons 2.700 chilometri de streda. Te raions da mont iel suvënz debujën de fé tuniei per garantì la segurëza, nsci ons de ndut 189 tuniei per na lunghëza de 51 chilometer. “Do la bona esperienza tla Urtijëi cialerons de adurvé chësta tecniches de ressanamënc per i 37 tuniei che messon cumedé ca” à dit l assessëur provinziel ala stredes.
“L strom te chësc tunel a Urtijëi nes custova dant 24.725 euro al ann, cun l ressanamënt fajons cont de spënder me plu 11.075 euro che uel di n sparani de 55%” à dit l assessëur Mussner.
as
