Atualità
Senteda dla Jonta provinziela dl 5 de lugio
USP – I argumënc de majer nteres tratei dala Jonta provinziela ai 5 de lugio, reverda la reforma tlinica y raions de produzion te luesc che pierd cumpëida de zitadins. L ie unì dat pro che i dependënc publics ne giapa ntan i proscimi trëi ani plu degun aumënt de paiamënt.
Lëures sun la scines Prëner-Dispruch
La scines dla ferata sun na lunghëza de 32 chilometri danter l Prëner y Dispruch muessa unì fates da nuef. Reprejentanc dla ferata dl’Austria ÖBB à da permò rujenà de doi alternatives cun l presidënt dla Provinzia de Bulsan. La Jonta provinziela à te si senteda tratà tramedoi prupostes. Sën dëssel mo unì rujenà cun la categuries nteressedes, dan che l vën fat al savëi la dezijion. Una varianta vëija dant de saré defin la linia dl Prëner per trëi mënsc tl ann 2012, cun l’opzion de pudëi marciadé ora i mënsc. Ntan i lëures messëssa l trasport de persones y de marcanzia unì spustà sun streda. Chësta varianta fossa de dann per l sistem provinziel che restëssa fërm defin. “Sce l muvimënt vën spustà dala ferata ala streda, saral dopro dessegur rie al spusté inò de reviers” se tëm Durnwalder. L’autra varianta vëija dant che dal 2011 inant possen per doi mënsc al ann me furné sun uni scina, y chësc per cin ani. Sun una scina possa danz me furné da 130 a 140 ferates al di, che ie me la mesa cumpëida permez a zënza. Ferates nternaziuneles dëssa unì trates dant. „Chësta soluzion purtëssa plu iedesc deficulteies, mplu fossa l custimënt feter 54 milion de euro plu cëre permez a saré me un n iede canche l custëssa feter 45 milion de euro “ à dit l Presidënt dla Provinzia.
Reforma tlinica
Do che l fova bel unì metù adum i cater raions saniteres a na sëula unità, uel la Jonta provinziela sën tré tres la reforma tlinica. Te chësta senteda iel unì tratà co smendrì l custimënt di spediei. “Ne ulon nia me sparanië ma nce miuré la cualità, a na maniera che uni pazient possa vester segur de giapé na cura adateda tla provinzia de Bulsan” à dit Durnwalder te cunferënza stampa. La Jonta se à data ju cun prinzipies dla reforma sciche l slargë ora dla medejina de basa y zëntri de cumpetënza ti spediei. I dutores de cësa dëssa nstës sëurantò vel cures y nia plu i mandé tla stazions de prim aiut o tl spedel. “L 70 percënt di pazienc che ruva tla stazions de prim aiut pudëssa unì curei dal dutor de cësa, che fossa plu a priesc y plu daujin al zitadin” à dit l presidënt. Per ruvé a chësc pont messëssa i dutores de cësa lauré de plu deberieda per se nuzé deberieda de njinies y pité si servisc da uni ëura. Per l lëur che vën sëuraprò dëssa i dutores nce giapé paià de plu.
N cont de spedei uel la Jonta provinziela arjonjer che la cures vënie fates tla Provinzia de Bulsan. Me te caji speziei dëssa i pazienc unì mandei te d’autra regions o sëura la sëida ora. Ajache nia duc i spediei ne puderà pité duc i servijes, dëssel unì njenià ite zëntri de cumpetënza. L sarà nce debujën de spusté stieres.
Firmes te luesc che pierd zitadins
Tenian cont che danter diesc y vint chemuns sciche Laurein y Proveis à truep zitadins che se n va, ulëssa la Jonta Provinziela che l vën frabicà sëntes de firmes. “La va de tò riesc pruvedimënc per garantì cualità de vita te chisc luesc” à dit l presidënt. Firmes che fej si sëntes te chisc luesc dëssa giapé de miëura cundizions. Per ejëmpl dëssa la mudazions al plan urbanistich jì inant plu riesc. Te chisc luesc dësse nce unì njenià la cundizions acioche l possa unì fat sëntes de firmes. Śën uniral laurà ora n program aldò.
Program dla televijion per turisć
N servisc de nfurmazions atuel y scëmpl sun cunzerc, jites, museums, manifestazions, festes y n. i. dëssel unì anjenià per i turisć dl Südtirol canche i mpeia la televijion. La Jonta provinziela fej cont de se nuzé de n canal dla RAS che tres la mudazion al sistem digitel ie mo liede. L unirà scrit ora n cuncors aldò ajache la prupostes ruvedes ite nchinamò ie massa cëres.
600 liec per Valdaura
La Jonta provinziela à dat pro che a Valdaura possel unì anjenià mo 600 liec. L Chemun che ova damandà 1000 liec nueves, muessa śën di tanc di 600 liec dai pro che possa unì fai te strutures nueves y te cëses che ie bele.
Degun aumënt per personal publich
Ntan i proscimi trëi ani ne unirà l paiamënt per l personal provinziel nia auzà. Per l ann 2010 muessa la Provinzia sparanië pra l personal, sce chësc resta n prinzip dl Stat. “N ie nce njeniëi a paië ora per l ann 2009 na soma sciche balanzamënt dla nflazion” à dit Durnwalder. Tant che fej ora chësta pert de paiamënt muessa permò unì calculà.
Raions periculëusc
Te na lëtra zirculera uniral cherdà i chemuns de mëter a verda a destiné raions periculëusc y de cunseguënza nce i raions da frabiché. Nchin ala fin dl ann muessa duc i chemuns anjenië n plann di raions periculëusc. Te chisc raions ne possel nia plu unì cumedà, ngrandì o fat da nuef cëses che ie bele. La cëses te de tei raions pierd l valor y ne n fé de nueves ne ie nia mesun. La sëula alternativa ie chëla de fé pruvedimënc che tol demez l pericul. L muessa te n tel cajo unì fat prutezions da ruves, levines o smueies, cosses che costa miliardes. “I chemuns ne possa nia udëi dant raions da frabiché, dopro I detlaré raions periculëusc y pona damandé scioldi dala Provinzia per tò demez l pericul” à dit Durnwalder.
as
