Atualità

Claus Vittur é nasciü l’ann 1967 a Bornech y vir a La Ila. Do la scora mesana àl fat la Scora d’ert a Urtijëi y dui agn do la matura, dal 1988 ćina al 1992, àl fat l’Academia d’Ert de Brera a Milan.

Claus Vittur dessëgna y depënj jö de retrać y motifs bele dan man, mo al ti va do a n tru daldöt personal y puzenëia le cheder da döt ći che é demassa. Süa ert n’é nia na reproduziun un a un de motifs, mo n prozès, che cheriëia n oget nü che madorësc y chilò se müdel y se svilupëiel sön tru la grandëza, le raport de löm, les formes y i contignüs. Vittur desdrüj sü chedri por i implì spo de na tenjiun döta süa. Fora de chisc vëgnel spo n chît perfet. La contrada reala ne ti interessëia nia a Vittur, mo an descür sambëgn pro d’ël n gran incherscimun do la daurida dla natöra, dada dal mer, da sperses amples y da de gran planöres. Chilò da nos él döt cant tan strënt, massa strënt. N valgügn motifs pê te n pröm momënt scëmpli y banai, mo sce an ti ćiara avisa devënti tres plü complesc. Inće le cheder che pê tl pröm nia avisa y turgher vëgn tres plü prezis sce an l’analisëia avisa. Le contrast crësc ti laûrs de Vittur y ti dà da ponsè a chi che ti ćiara. Dainré incùnton ti motifs de Vittur porsones, gonot vëgnel inće eliminé düć i atri ogeć. La pitöra de Vittur é caraterisada dal chît y dal öt, da contrades bludres y malinconiches, che ti trasmët al osservadù sensaziuns desperades de eternité y surité esistenziala. (Simone Frangi)

A Claus Vittur ne ti sal nia bel da baié de sü laûrs. Al i adora da comuniché y prô de capì olache le tru ô le condüje. Sües operes le dëida ciafè so tru artistich, mo inće esistenzial. I ogeć ne n’é te sü chedri mai al pröm post, dër important é l’öt por ël. Lercs frëides, bludres dominëia sü laûrs y la löm determinëia la scena. I motifs, che ispirëia sü chedri, vëgn da archifs virtuai, al é motifs universai. Vittur va le tru dla semplizité y dla normalité y se tralascia deplëgn sön sü sënsc y sentimënć. Chësc tru ne le condüj indere nia te n post sigü, inće le tëmp resta indefinì. Le ćiarü fej ia la odlada sön l’orizont y les stighes condüj dagnora söpert: al é la metafora dla vita. Sü chedri trasmët malinconia y incherscimun do l’assolut, ai ne s’insëgna nia veritês, mo s’implësc plütosc de domandes. Vittur ti sciampa a süa storia personala y pëia ia te na dimenjiun cosmica, te chëra che vignun de nos svilupëia aspeć desvalis, individuai. (Angela Madesani)

Cerna dles mostres plü importantes

2005 Ragenhaus Bornech (Südtirol)
2007 Museum dla Zité de Tlüses (Südtirol)
2007 Galleria Lietti – Como
2008 Campus Point – Lecco
2009 ZonaK – Milan
2010 Analogie – Chiesa S. Pietro in Atrio – Como