Atualità
Feter duc i candidac ladins ie passei l ejam de stat
USP – 42 de 44 sculeies che se à prejentà per l ejam de stat tla scoles autes ladines ie nce passei. La majera pert di candidac à finà via la scola auta cun n resultat danter 71 y 80 ponc. Cun l sistem n fregul nuef, ne iel chëst ann stati deguni che à arjont i 100 ponc. Tla valedes ladines ie me doi sculeies nia passei l ejam de matura.
La majera cumpëida di sculeies à chëst ann arjont na valutazion mesana pra i ejams de stat. L 88% di 44 sculeies à finà via la scola auta cun na valutazion danter 61 y 90 ponc. Tl ITC a Urtijëi à 10 finà la sezion IGEA y 11 la sezion turistich/linguistica. 7 sculeies ie passei l ejam tla Scola d’Ert a Urtijëi y 16 l ITC a La Ila ulache doi ne à nia arjont l diplom.
Permez ai ani passei iel chëst ann stat de pitla mudazions tl sistem de dé i ponc dla matura. Sun na cumpëida mascima de 100 ponc, à daniëura la cater proves scrites abù l majer pëis cun al plu 45 ponc. Da nuef iel che 5% di ponc ie unic spustei dala prova a usc de viers dl credit furmativ che i sculeies tol pea dala cin tlasses de scola auta.
Deberieda cun l diplom de matura, iel per l prim iede nce unì dat ora na zertificazion dla cumpetënzes te chëla che l sculé giapa na descrizion dl livel arjont te na forma damandeda y recunesciuda a livel de Europa. “Sëuraprò al savëi, mostra la zertificazion dla cumpetënzes l savëi fé” spiega l ntendënt ladin Roland Verra.
as
