Atualità
Senteda dla Jonta provinziela dl 12 de lugio
USP – La pruposta de lege sun i purtoies dai schi, n recurs per la merca „Suedtirol“ y la rujenedes sun la tofles di troies da mont ie stai trëi di argumënc de majer ntres tratei ncuei (12 lugio) dala Jonta provinziela y prejentei te cunferënza stampa.
Regulamënt per purtoies dai schi
La Jonta à dat pro la pruposta de lege per i purtoies da schi che vëija danterauter nce dant la puscibltà de jì a pe sun ëur de purtoi. Chësc sarà mesun cun o zënza schi, ti orars che l ne vën nia laurà sun i purtoies cun i giac dala nëif. La pruposta de lege, che cumporta nce la regules per l casco y i patrons di grunc, vën śën mandeda inant al Cunsëi provinziel.
Recurs per la merca Suedtirol
La Provinzia fej recurs contra la sentënza che ti à dat rejon ala registrazion dla merca „Suedtirol“ da pert dla firma Internet Consulting Srl de Burnech. Aldò di aministradëures pudëssa chësta merca vester rejon de cunfujion cun la merca provinziela „Südtirol“. N cajo de chësta sort ova la Provinzia bele venciù canche la se tratova dla merca „Alto Adige“.
Rujenedes sun la tofles
L presidënt Durnwalder à cuntà ala Jonta provinziela dl’ancunteda cun l minister per la regions Raffaele Fitto per via dla tofles di troies da mont. L Minister Fitto ie de chëla che l dëssa vester respetà l bilinguism. De chësc vieres à l presidënt Durnwalder lecurdà che chësc ie me de ublianza sce la tofles ie sun puscion publica y sce les ie metudes su da urganisazions che à giapà finanziamënc publiches per chësc lëur. „Ma nce te chisc caji ne muessel nia unì fat la traduzion de duc i inuemes“ à dit l presidënt, juntan che i inuemes storics dëssa resté y la traduzion dëssa me unì fata de numinazions sciche luech, pra o utia. L Cumissisariat dl Guviern à detlarà che feter 36.000 tofles ie me scrites per tudësch. L presidënt à dit che la Provinzia lascerà cialé do ciuna de chësta tofles che ie sun puscion publica y privata. „La tofles sun puscion publicà messerà unì fates da nuef, ma n var al iede“ à dit Durnwalder che à rujenà de na forma cuncreta de culaburazion da fundamënt. „La ne se trata nia de toponomastica che se adrova na lege aposta. L ie n prim var y pënsi che a chësta maniera ons demustrà de vester boni de dialoghé y de abiné n cumpromis che duc possa azeté“.
Tuesse tla puscions a Bulsan Sud
La Jonta à fat ora de dé sëura respunsabli nia cunesciui per via dla mpaziamënt di grunc a Bulsan Sud, che muessa sën unì ressanei cun scioldi publics per no resië de mpazië nce l’eghes. Chësc lëur vën a custé feter 4,5 milion de euro. „L ne ie nia drët che chësc ressanamënt di grunc vën paià cun la chëutes di zitadins sce l dann ie unì fat dala firmes de chësc raion“ à dit l presidënt dla Provinzia.
Cumpetënza per l fit publich
La Jonta à tratà l pruvedimënt de sparani dl Minister dl’economia che vëija dant na registrazion de duc i cuntrac d’afit publics sëurandajan al’Agenzia del demanio la cumpetënza per fé i cuntrac. La Provinzia à fat al savëi ai chemuns che i dëssa me fé al savëi i cuntrac che ie iust n drova. La Jonta provinziela ie dla minonga che l ie na cumpetënza provinziela y à perchël fat recurs ala dezijion dl Minister a Roma.
Plans de alarm y ntervënt per gran eghes
I assessëures à dat pro l plann de alarm y ntervënt laurà ora da nuef per i ruves dl Adesc y Isarch. Chësc ie stat debujën tenian cont nce dl pericul de gran temporai che pudëssa purté a de gran eghes y a chësta maniera n pericul per la populazion.
Mantenì vedla cëses
Passa 1000 de vedla strutures tla provinzia de Bulsan ie sota defendura di monumënc, ma trueps d’autres se meritëssa de unì defendudes. Truep caji reverda cëses che messëssa unì mantenides nce sce nia defendudes dala defendura di monumënc. Chësta defendura ne lascia te truep caji nia pro de frabiché na cësa nueva che cumpurtëssa l zaré ju dla vedla.
Sce n chemun giapa la dumanda de frabiché na cësa nueva o n tublà nuef, possel aldò dla Jonta damandé na minonga cualificheda ala Cumiscion per la cultura dl frabiché. Sce chësta dij che la vedla cësa dëssa unì mantenida, puderan fé la cësa nueva zënza zaré ju la vedla.
Troies da mont nchin a 1,5 metri
Sun troies da mont plu strënc de 1,5 metri possen me jì a pe o cun la roda o a ciaval, ma nia dut te un. Chësta dezijion de basa à la Jonta provinziela tëut dajan pro l plann raionel dl Chemun dl Renon. „La dezijion reverda i troies dl Chemun dl Renon, ma la pudëssa nce unì sëurantëuta da d’autri chemuns“ à dit Durnwalder.
Cuntribuc SOA me mo nchin tl 2012
Cundizion per giapé n lëur publich ie dlongia la capaziteies tecniches y economiches de na firma, nce la crëta. Tla Talia vën chësc zertificà dala SOA (Societá organismi di attestazione) y ie debujën per ncëries sëura 150.000 euro. Davia che la zertificazion ie plutosc cëra, à la Provinzia judà do sëurantulan nchin a 75% dl custimënt. „Passa 700 dumandes ie unides mandedes ite, nsci iel unì dat cuntribuc per na soma de cin milion de euro“ à dit l presidënt dla Provinzia. Per limité la spëises te chësc ciamp, vën l cuntribut tl ann 2011 smëndrì dl mez y per l 2012 tëut demez defin.
as
