Atualità
Peter Demetz ala Trienala Ladina
USP – Ai 23 de lugio deura tl Museum Ladin la terza ediziun dla Trienala Ladina. Al concurs de chësta mostra à fat para 36 artisc che à dè jö sües idees tres espresciuns artistiches desfarëntes sciöche la pitöra, la grafica, la scoltöra, l’istalaziun o l’ert conzetuala. Peter Demetz de Sulé/Urtijëi é le su che à presentè na scoltöra de lëgn danter i sis artisc' che à davagné le concurs.
Peter Demetz à fat le tru artistich tradizional dl scultur de Gherdëna. Do n ann de scora d’ert a Urtijëi él stè sis agn alalungia lerner tla bercstot de Heinrich Demetz y cun 24 agn àl fat l’ejam da maester scultur. Le medemo ann àl inće scomencè da fà para a mostres coletives a Urtijëi (Unika), a Milan Vail/Colorado, a Leipzig, tl Lichtenstein/SA, a Gent, a Firenze, a Lecce, a Palma de Mallora, a Istanbul y a Roma.
Dal 1995 inant à Peter Demetz insigné set agn alalungia dessëgn, storia dl’ert y scoltöra tla scora profescionala a Urtijëi y a Sëlva. Al à inće fat na formaziun de trëi agn tl ciamp dla pedagogia, dla didatica, dla psicologia dl aprendimënt y dl svilup.
Dl 2002 àl surantut na inćiaria sciöche dozënt responsabl dl curs de stüde “ert dla scoltöra de lëgn” dla Université de Zwickau (Paîsc Todësc), facolté d’ert aplicada de Schneeberg pro le Daetz-Centrum tl Lichtenstein/SA. Dal 2007 incà colaborëia Peter Demetz cun la galaria “Artforum” de Bolgona (Talia).
“Le scoltur pê orëi sfidé i confins dimenjionai. Stargates che se le pormët da jì sura chël che i definiun normalmënter sciöche realté fora, por rové a na situaziun, olache l’individuum perd süa mascora soziala y se ciafa insciö daldöt ël instës y süa integrité interna.” - Valerio Dehò, Bologna.
“Les composiziuns plastiches de Demetz ne corespogn a degönes lercs abitatives, ares n’ô nia cuntè les stories de certes figöres, mo ares ô mostrè sö lercs esistenziales, sciöche lercs te chëres che ara va da ciafè indô la cosciënza de se instësc. Ma tres chësta cosciënza rovunse tles lercs dl iö.” -Maurizio Vanni, Firenze.
“Peter Demetz m’à tochè cun sü chedri pici/gragn, dër autentics. Demetz inscenëia, cheriëia lercs por la vita da vigni dé, che me lascia ponsè te süa tlarëza geometrica definida avisa plütosc a bunker co a lercs abitatives” - Bruno Raetsch, Dresden.
Reconescënzes
2007 Pröm pest pro le concurs “Nova” dla Provinzia de Balsan, opeera: “Dialogh”
2007 Pröm pest pro le concurs por le 60° aniversar dla Fiera de Balsan, opera: “Paiun 1”
2008 Premié pro le “Premio Arte” dla revista Arte – Giorgio Mondadori, opera “Lo Specchio”, 2008
2009 Premié pro le concurs artistich “eroism – inier, ncuei, duman” dl assessorat ala cultura ladina en colaboraziun cun le “Südtiroler Künstlerbund”, opera: “... hero...”, 2009
2010 Davagnadù dl concurs artistich “Trienala Ladina” dl museum ladin Ćiastel de Tor a San Martin de Tor
2010 Pröm Pest pro le “Premio Arciere” a Sant’Antioco tla Sardegna, opera: “L’analfabeta”
as
