Atualità
Da sëira butëighes daviertes te Gherdëina y Corvara
USP – 31 chemuns dla Provinzia de Bulsan pieta nce ntan chësc instà la butëighes daviertes da sëira. L assessorat provinziel per l cumerz deberieda cun l’assoziazion per l cumerz, turism y servijes à nvià via nce chëst ann la scumenciadiva de suzes. Do Urtijëi, scumëncia ncuei (19 lugio) S. Crestina cun si program de “shopping” ntan la sëires da instà. N merdi ai 20 y pona n juebia ai 22 tenirà Sëlva y Corvara si prima sëires de program da sëira cun la butëighes daviertes.
„La butëighes daviertes da sëira ti dà n majer valor ai zëntri, i mantenian vives y atratives” sorissea l assessëur provinziel Thomas Widman y l presidënt la dla lia di marcadënc HDS Walter Amort. “Cun la butëighes daviertes ntan una o doi sëires al’ena devënta i zëntri di luesc ponc de ancunteda per i zitadins.” Per chësta rejon vëniel deberieda sustenì la scumenciadiva.
Urtijëi ie stat l prim di cater luesc ladins che à chëst ann scumencià a pité la sëres cun la butëighes daviertes. Nchin ala fin de agost vën la butëighes tenides daviertes de mierculdi y vënderdi sëira. La majera pert de chësc tëmp puderan jit danter la 9 y la 12 da sëira tla butëighes, me la prima y l’ultima ena stlujerà la butëighes de Urtijëi da mesa la undesc.
Ncuei lunesc, 19 de lugio vëniel metù man a S. Crestina cun la butëighes daviertes da sëira. For lunesc y juebia gëura tlo la butëighes dala 20.30 nchin la 22.00. L’azion jirà inant nchin ai 26 de agost.
Te Sëlva gëura la butëighes de merdi y vënderdi danter la 21.00 y la 22.30. La prima sëira sarà ai 20 de lugio y nce tlo uniral jit inant cun l’azion nchin l’ultima ena de agost.
Nuvità de chësc instà per la valedes ladines ie che nce Corvara gëura si butëighes da sëira. La juebies sëira ne unirà nia me dedichedes ala butëighes ma nce ala mujiga jazz y ai mëndri cun n program speziel.
“L ie mpurtant che l vën dat n majer valor ai zëntri cun azions y programs che à l fin de mantenì la vela de butëighes daujin ala cëses, de ti dé vita ai luesc a na maniera che i se mantën atratives da viver” dij la assessëur Widmann. La butëighes daviertes da sëira ntan l instà ie n model drët garatà de culaburazion danter cumerz, manco muvimënt di auti y l tré ite de plu ciamps economics sciche artejanat, gastronomia y turism.
La sëires cun la butëighes daviertes pieta nce ucajion de se ancunté y de scumenciadives sëuraprò ti luesc. La lista de duc i 31 luesc dl Südtirol che pieta l “shopping da sëira” ie publicheda tl internet sun la plates dla lia di buteghieres www.hds-bz.it y nce sun la plates provinzieles www.provincia.bz.it/economia/4622.asp
as
