Politica | 19.07.2010 | 15:01

Senteda dla Jonta provinziela dl 19 de lugio

USP – “La Jonta provinziela se à detlarà contra l culegamënt dl’autostreda Alemagna tres la Dolomites. - L bonus de cubatura puderan nce giapé sce l vën trat ju la vedla cësa. - Salvé i ciuleies dal vin a Girlan”. Chisc ie stai i argumënc prinzipei prejentei ncuei, 19 de lugio, tla cunferënza stampa riesc do la senteda dla Jonta provinziela de Bulsan.

“No” al’Alemagna

Ultimamënter iel a livel naziunel y da Unieja unì posizions che ulëssa inò fé levé su l’idea de n’autostreda de culegamënt danter l Cadore y l’Austria. L presidënt provinziel Durnwalder à dit de no ulëi lascé unì su de fauza speranzes. Bele ti ultim ani a la Jonta provinziela de Bulsan giapà da plu pertes la ncëria de se paré contra na segonda autostreda tres l Südtriol. Doi argumënc ie ntant ruvei leprò: La cunvenzion per la defendura dl’Elpes ie bele unì ratificheda dal’Austria y dal Deutschland. “Nce sce la Talia ne à mo nia fat na lege dainora ne dëssel nia vester mesun frabiché l’Alemagna” à dit Durnwalder. Segondo argumënt sterch contra l’Alemagna ie l’Arpejon mundiela Unesco per valorisé y defënder la Dolomites: aldò dla Jonta provinziela n argumënt defin contra frabiché n’autostreda.

Bonus de cubatura nce a zaré ju

Per ressanamënc energetics de vedla cëses giaten n bonus de 200 metri cubich de cubatura sce n arjonj l livel de cësa tlima „C“. Chësc bonus giaten nce sce n zera ju n pert la vedla cësa. Da nuef iel śën che l bonus vën nce dat sce n zera ju la cësa de fin. La cundizions ie che l vënie arjont l standard de cësa tlima “A” y che duc i cuatieres vënie cunvenzionei y a chësta maniera resservei a chëi che à la residënza.

Salvé y valorisé i ciuleies dal vin

Cun plajëi à la Jonta provinziela tëut a cunescënza l’idea de fé n “Mond dal vin” ti vedli ciuleies de Ghirlan y de lauré ora na “Weinmeile” tl Überetsch. Davia che i vedli ciuleies ne vën nia plu adurvei iel pericul che i vënie adurvei autramënter y che na testemunianza storico-culturela vede perduda. L’idea prejenteda vëija dant culegamënc danter 13 di vedli ciuleies dal vin y de ti dediché a uni un vel argumënt dla vedla cultura dal vin. “La vijita dëssa deventé na avenimënt per la jënt, fulestieres y nce esperc dl vin” à dit Durnwalder. Chësta njonta al museum dal vin de Kaltern ie unida proieteda per feter 8 milion de Euro. La Jonta provinziela ie a una de judé pea sce nce i chemuns, l’urganisazion “Weinwelt” tën pea y la populazion sustën chësta scumenciadiva. Cundizion per scioldi publics ie nce che la gestion vën garantida da privac.

Degun transit sun l Fernpaß

L’Austria ne uel nia plu lascé pro transit de mesuns pesoc sun la streda dl Fernpaß. Sun chësc pas de culegamënt danter l’Austra y l Bayern dëssa me plu pudëi passé camions che muev o ruva ti raions iló daujin. Sce feter vint speditëures dla Val Venuesta y dl Burggrafenamt ne possa nia plu passé l Fernpaß per furné a Minca, muessi fé la raida per Bulsan che fej ora passa 100 chilometri de plu. “La cunseguënzes fossa dantaprima economiches y sfurzëssa i speditëures a lascé jì truep lauranc” à spiegà Drunwalder. Canche l presidënt dl Tirol Günther Platter unirà l’ena che vën a Bulsan purveran a arjonjer velch per i speditëures dl Südtriol.

Ferata Dispruch-Prëner

L Presidënt dla Provinzia à prejentà ala Jonta la posizion dl mprenditëures per via de saré la scines danter Dispruch y l Prëner. Duc i reprejentanc che se à ancuntà cun Drunwalder à dit che l fossa miec saré me una dla do scines per doi mënsc al ann y chësc per cin ani, mpede saré defin la scines per trëi mënsc. De chësta minonga ie nce la Jonta provinziela.

Zënter culturel a l’Aquila

L ambolt de Ocre dlongia l’Aquila à pra si ancunteda cun l presidënt dla provinzia pià bel de n aiut a fé su n zënter culturel. Te chësc raion à la Provinzia de Bulsan bele fat su 20 cëses per la persones tuchedes dal tremot. La Jonta provinziela ie śën stata a una de tò i 350.000 euro de dunfiertes che ie mo a desposizion per fé n zënter culturel.

Zënter de inuvazion TIS

Reprejentanc dl mont economich à criticà l proiet de n zënter de inuvazion nuef a Bulsan Sud. Drunwalder à ncuei mo n iede stlarì che l ie debujën de fé nvestimënc tl svilup y tecnologia. “I criteries de Lissabon vëija dant trëi percënt dl prudot ntern lordo (PIL/BIP) per chësc ciamp, tl Südtriol ons nvestimënc de 0,8%” à dit Durnwalder che vëija tl zënter TIS n pruvedimënt mpurtant per pité stieres nueves a persones cualifichedes. Nchiamo fovel unì fat prescion sun la Jonta de fé de plu per l svilup y la tecnologia. Śën an prejentà l proiet de pité n zënter amez ala firmes per n custimënt de 100 nchin a 120 milon de euro spartì sun 10 nchin 12 ani. L’idea ie de fé na pert publica per la tueda y cunsulënza, y na pert privata spartida su sun modui ulache l possa nce unì fat produzion. Durnwalder à detlarà che l zënter unirà me fat sce l mont dl’economia l uel nce, autramënter uniral nce lascià vester dut.

Proscimo lunesc na dezijion sun la reforma tlinica

L’ena che vën uel la Jonta provinziela de pro la reforma sun la strutura sanitera tla Provinzia de Bulsan. Ncuei iel unì fat na descuscion sun la pruposta, ma la dezijion ne ie mo nia unida tëuta. Canche l fundamënta sarà data pro dëssa esperc mo giapé trëi mënsc de tëmp per lauré ora l’atuazion a na maniera che la reforma possa mo jì n drova dan la fin dl ann.

as

Galaria dales fotografies

La Jonta provinziela de Bulsan;