Atualità
Truepa rodes tla ferata – Widmann cunsieia l mpresté
USP – A tò pea la roda tla ferata pudëssel unì a se l dé dificulteies per via dla gran cumpëida. “L bel tëmp ntan la feries cumporta che trueps dala roda furnea nce cun la ferata, a chësta maniera ne iel nia for lerch assé per la rodes” spiega l assessëur Widmann, che cunsiëia de mpresté la roda.
Dantaprima tla val Venuesta y tla val de Puster iel chisc dis trueps che tol la ferata per jì pona a fé na jita cun la roda. “La ferates de SAD y Trenitalia à lerch per la rodes, ma la gran cumpëida de chësta sajon ie mo majera” dij l assessëur che descunsiëia chisc dis de tò pea la roda tla ferata. La miecia, nsci l assessëur, fossa de se mpresté ora la roda tla lueges sun la streda dala rodes. A chësta maniera pudëssen astilé ora che la ferates vënie sëuraciariedes y de cunseguënza l messëi aspité giut.
Do la bona speriënzes dla cumbinazion de roda y ferata tla val Venuesta, ie chëst ann unì njenià servijes che mprësta rodes tla stazions de Puster y a Bulsan Sud. La rodes mprestedes possa nce unì dates de reviers te n’autra luegia. Te chësc cajo possen cun la cherta "Südtirol Bikepass" che n giapa a mpresté la roda, furné de reviers cun mesuns publics. Cun la cherta dla curiera o ferata, cherta valor o Mobilcard giaten l medemo di n miëur priesc a presté la roda.
Al mumënt vëniel a livel provinziel laurà ora n cunzet nuef per mpresté rodes tla stazions dla ferata. Al mumënt giaten da mpresté rodes tla stazions de San Ciana, Toblach, Burnech, Mühlbach, Bulsan Sud, Maran, Naturns, Latsch, Spondinig, Schlanders, Mals y pra la stazion dla curieres sun l Reschen. Nfurmazions mplu giaten nce sota www.suedtirolbahn.info tl internet.
as
