Atualità
Lëures da instà: cunsëies y nfurmazions
USP – Co ruvé pra n lëur da instà? Ce pusciblteies de atività à pa jëuni? Ulà iel pa da giapé n lëur? Respostes a chësta dumandes cun nfurmazions apuntin sun lëures da instà dà l Ufize provinziel per Jëuni sun la plates internet dla Provinzia.
Truep jëuni ulëssa nuzé la feries da instà per se fé n cheder dl mond dl lëur, fé speriënza de lëur y nce davanië velch. Abiné n lëur per l instà ne ie nia for saurì. La va de abiné la drëta ucajion, vester n regula y de ruvé a una cun l patron n cont dla drëta forma.
L Ufize provinziel per i jëuni pieta aiuc. L ie unì njenià nfurmazions y cunsëies che va dal se anjenië, l crì l lëur, l se prejenté, l cuntrat de lëur nchin a links a plates internet. Da puec dis ie dut chësc unì publicà sun la plates provinzieles www.provinz.bz.it/kulturabteilung/jugendarbeit/sommerjobs.asp.
“L ne ie nia defin nia saurì a mëter adum nfurmazions cumpletes sun chësc argumënt” spiega l diretëur de ufize Klaus Nothdurfter. Jëuni y esperc ie nviei a dé si cuntribut a miuré la plates de nfurmazion. Jëuni ie nce priei bel de cunté de si speriënzes a na maniera che l vënie a se l dé n forum. Per n auter ann fejen cont de dé ora n cudejel dedicà al job da instà.
Per jëuni che ne à mo nia abinà l lëur per chësc instà iel de aiut a ti cialé ala plata internet nueva. Sëuraprò ai lëures vëniel sun nce dat nfurmazions sun lëures da instà oradecà, l servisc zevil ulenter o feries per mparé rujenedes.
as
