Atualità
Trienala Ladina y pest Agreiter: n vënderdi giaurida y premiazion
USP – Cun la giaurida dla terza edizion dla Trienala ladina, duman vënderdi 23 de lugio tl Museum Ladin uniral nce fat al savëi chi che à venciù l pest artistich dunà da Richard Agreiter. A uneré i artisc’ saral nce l presidënt provinziel Luis Durnwalder y l’assessëura dl Tirol Beate Palfrader.
L titul dla Trienala Ladina da chëst ann ie “Mirrored Stories”, stories spidledes. Aldò dl cunzet dl curadëur Adam Budak iel na mostra dopla, l studi de na simetria (mpuscibla), n purvé a dé dant na dicotomia de na sëula reprejentazion. Na giuria nternaziunela à cris ora pitures, grafiches y acuarei, fotos, scultures y nstalazions de sies artisć: Peter Demetz de Urtijëi y Romana Prinoth de Sëlva, Ester Schena di Grijons, Claus Vittur da La Ila y Barbara Tavella dal La Val cun Veronica Zanoner de Moena.
Deberieda cun la giaurida dla Trienala uniral nce fat al savëi chi che à venciù l pest artistich de scultura Richard Agreiter. Chësc pest de 10.000 euro vën dat ora per l segondo iede. Fat pea à tlo scultëures dla valedes dl Tirol storich. L scultëur Richard Agreiter, fi de genitores badioc jic a sté ntan l’Opzion a Steinberg am Rofan tl Tirol, à l ann passà pudù pië do l titul de prufessëur y ie nce unì numinà cumëmber de unëur dl Südtiroler Künsterbund. Agreiter à dunà si scultures al Museum Ladin Ciastel de Tor.
Culaburadëures di media ie nviei ala giaurida dla III. Trienala Ladina
n vënderdi 23 de lugio dala 18.00
tl Museum Ladin Ciastel de Tor
a San Martin de Tor
y de fé al savëi ala populazion.
L unirà adalerch l presidënt dla provinzia Luis Durnwalder, l assessëura ala cultura dl Tirol Beate Palfrader, l curadëur dla Trienala Adam Budak y l scultëur Richard Agreiter.
La festa unirà abelida dala grupa de mujiga jazz-pop Kind of Camilla de Maran.
as
