Atualità
Jonta provinziela azetea la cherta de identité per ladin
USP – Ti chemuns ladins dla Provinzia de Bulsan giateran la cherta de identité cun la dizions nce tla rujeneda ladina. Sun pruposta dl assessëur Florian Mussner à al Jonta provinziela ncuei (26 lugio) dat pro che la rujeneda ladina giape sun chësc documënt de identité la medema lerch sciche l talian y tudësch.
Cun l dé pro dla Jonta provinziela scumëncia śën l iter acioche ti chemuns ladins possel unì dat ora la cherta de identité te trëi rujenedes. Bele tl decret lege dl 4 auril 2006 (nr. 177) fovel unì udù dant chësta puscibltà ti chemuns de Gherdëina y dla val Badia. Ncuei (26 lugio) à la Jonta provinziela dat pro la pruposta dl assessëur ladin Mussner. “Chësc ie n gran var inant per nosta populazion ladina ajache l ie n recunescimënt dla mendranza a livel aut, n documënt recunesciù a livel naziunel y nternaziunel” se ncunforta Mussner. La cherta de identité spiedla nosta identité y la recunescënza ufiziela ie nscì nce na valorisazion dla identità ladina.
La passa 20 esprescions ladines dla cherta ie unides lauredes ora dal Istitut Culturel Ladin Micurà de Rü. Te chësc lëur scientifich iel unì fat na nescida per abiné formes che tën cont di idioms de valeda, cialan che i ladins de tramedoi valedes possa se identifiché cun chësta singula paroles. Dan la prejenté te Jonta, ie la pruposta nce unida analiseda dal’avocatura dla provinzia, che à dat n bënsté positif.
La pruposta data pro dala Jonta provinziela de Bulsan messerà śën unida mandeda inant dal Presidënt dla Provinzia al Cumisser dl guviern acioche ël possa la dé mo n iede inant al minister cumpetent. A Roma messerà la pruposta unida data pro cun n decret.
Chësc troi ie nce unì fat te Fascia. De dezëmber 2008 à l presidënt provinziel Lorenzo Dellai mandà inant la pruposta che ie pona ai 4 de dezëmber 2009 unida data pro a Roma tres decret ministeriel. Nchin śën ne iel te Fascia mo nia unì dat ora la chertes de identité bilingua, ajache n aspieta mo for che les vënie stampedes dal poligraf de stat.
L assessëur Florian Mussner à nce purtà dant ai autri assessëures provinziel la pruposta de adurvé la cherta de identité te trëi rujenedes te duta la provinzia. Chësc ne ie nia stat mesun ajache tla normes de atuazion fovel me udù dant per i chemuns ladins. Te chësc documënt mancia dlongia i 8 chemuns ladins dla provinzia de Bulsan la frazions ladines da Ciastel: Sureghes, Runcadic y Bula. La Jonta à dat pro de junté chësta frazions tla norma de atuazion canche les unira mudedes.
as
