Economia | 02.08.2010 | 16:07

18,7% de plu nuetes afitedes - Berger cumët de fé dut l puscibl acioche la vede inant nsci

USP – Permez a dan diesc ani ie la cumpëida de liec ti hotiei aumenteda de 3,7%, tl medemo tëmp ie la cumpëida de nuetes afitedes aumenteda de 18,7%. “Chësta zifres desmostra che son n’ezezion” à dit l assessëur al turism Hans Berger n ucajion dl ancunteda cun i respunsabli dl SMG per rujené dl svilup turistich. “Messon lauré a na maniera che chësc svilup posse jì inant” mët a cuer l assessëur Berger.

Dal ann 2000 ie la cumpëida de cëses cun liec turistics te diesc ani aumenteda da 10.000 a 10.200, i liec ti hotiei ie aumentei da 211.000 a 219.000 y la nuetes afitedes ie aumentedes de 18,7%. I liec ie unic afitei ora per 149 al ann, mpede per 129 dis sciche tl ann 2000. “Chësta zifres fej gran plajëi, purempò ne dasson nia sëuraudëi che l aumënt de davani de chësta mesures ie me puscibl sce stimenea nce i priejes” spiega Berger, se damandan dai hotelieres y chëi che fita via che l ti muessa vester tler che chël che vën pità muessa nce avëi si priesc.

Nce sce tla provinzia de Bulsan vëniel adalerch 5,6 milions de turisć, ne possa la provinzia nia deventé n raion de turism de massa. “Sce n paredlea cun l furnimënt, pona ie la feries te mega hotiei sciche cumpré guant dala curona, ntan’ che feries tl Südtirol dëssa vester sciche cumpré n pez dal sartëur” dij Berger fajan referimënt ala sanità, natura, cuntat cun la vita da paur y feries atives sciche gran trend di proscimi ani. Tl cajo de ativiteies ala lergia muessa Südtirol, nsci Berger, mëter a verda de mantenì si lidëza de muvimënt d’inviern y d’instà.

N cont dla naziunaliteies di turisć fej Berger riferimënt al aumënt di taliani che dal 2006 ie aumentei de 600.000. A chësta maniera iel unì curì l busc de turisć tudësc. De mei y juni de chëst ann ie purempò calei i turisć taliani de 3,5%. “L ie da speré che chësc ne sibe nia n stlet sëni o cunseguënza dla crisa” dij l assessëur.

A na maniera che l turism ebe nce tl daunì tan de suzes tla provinzia de Bulsan, sënten sun gran retlam sun marcei nueves y sun i marcei tradiziunei. Lauran de chësc vies iel nce debujën de crì y se nuzé de sinergies danter cunsorc turistics. “Messon nce se adaté a n cumpurtamënt nuef n cont de feries: apusté al ultimo mumënt y feries plu curtes”, nscì Berger.

Na rezeta de suzes ie aldò dl presidënt dl SMG Reinhold Marsoner l mantenì dl’autentizità, la flessibilità dla mprejes familieres, l respet per la cuntreda y n miëur culegamënt danter agricultura y turism. Christoph Engl, diretëur dl SMG, ti dà pëis ala pusciblteies de arjonjer i luesc, sibe a livel psicologich che digitel. Nce sce l apusté liec per via digitela devënta for plu mpurtant, ne à feter 1000 cëses mo for deguna adres e-mail.

as