Atualità
Ideies per valorisé l zënter de S. Crestina
USP – L proiet de valorisazion dl zënter de S. Crestina, nvià via dal Assessorat provinziel per l cumerz, ie ruvà te si fasa plu cuncreta. Te si senteda dl 3 de agost se à la grupa de lëur sëurantëut de lauré ora na desëina de ideies per miuré l’atratività dl zënter y nsci nce sustenì l svilup economich y de cunseguënza la cualità de vita tl luech.
Sun basa di resultac dla nrescida danter la populazion che fova unida fata d’ansciuda y ntervistes a reprejentanc dl ciamp turistich à l prufessëur Luciano Pilati cun l studio Giovanelli de Trënt purtà dant na desëina de ideies per miuré l’atratività dl zënter. Te plu sentedes ova la grupa de lëur cun passa vint reprejentanc dla lies cumerzieles, sozieles y cultureles de S. Crestina, deberieda cun l’aministrazion de chemun tratà i resultac dla nrescides. Śën iel unì metù sun mëisa na lingia de ideies acioche la jënt vede plu gën tl zënter de S. Crestina. I reprejentanc dla categuries dl luech se à sëurantëut de ti jì plu sot ala singula ideies y de udëi danora la cundizions per pudëi lauré ora proiec y la realisazion. La se trata dantaprima dl ruvé permez al zënter y de cunseguënza la regulamentazion per i auti, l raion da jì a pe, la lueges per i auti y l cialé ora dl zënter tla streda Dursan. Leprò ruva mo ideies che reverda la gestion de scumenciadives tl zënter, elemënc che possa tré la jënt tl zënter, prupostes per la families o scumenciadives.
Per l autonn fejen cont de stlù ju l proiet de valorisazion dl zënter cun n catalogh de proiec da sëurandé al’aministrazion de chemun. “A chësta maniera arjunjons a S. Crestina l fin de tré su i zëntri ti luesc da pont de ududa cumerziel, funzionalità y atrazions sciche n se à tëut dant per lege provinziela” spiega Hansi Fleder, diretëur de repartizion provinziela. S. Crestina fova unida crissa ora sciche un di luesc pilot tla provinzia de Bulsan per scumencé cun n proiet de valorisazion. L fin ie de capì y svilupé cie che possa unì fat acioche l zënter dl luech giape mo n majer valor. “Me fej plajëi che a S. Crestina iesen bele ruvei tan inant y che puderon tosc udëi fruc de chësc proiet” se ncunforta l assessëur provinziel al cumerz Thomas Widmann. L proiet de valorisazion dl zënter vën sustenì dala Repartizion provinziela per l cumerz, l’Associazion provinziela per l cumerz y servijes HDS. L sustëni scientifich ie curà da esperc dl’università de Trënt.
as
