Atualità
Assessëures Mussner y Kasslatter pra la festa di 50 ani Museum de Gherdëina
USP – I assessëures Florian Mussner y Sabina Kasslatter Mur tulerà n sada 7 de agost pert ala festa di 50 ani Museum de Gherdëina. Nce l ntendënt ala scoles ladines Roland Verra tenirà na rujeneda sun l patrimone culturel de Gherdëina.
L Museum de Gherdëina ie stat l prim museum che ie unì giaurì do la viera tla provinzia de Bulsan. L vën metù ora passa 4000 pec d’ert y artejanat, naturalistics y archeologics, che testemunieia la storia de Gherdëina dala furmazion geologica dla Dolomites nchin su te nosc tëmps. Da udëi iel nce pec dla storia populera, l scumenciamënt dla chiena y scultura de Gherdëina, nchin al arpejon de bera Luis Trenker.
N sada ai 7 de agost festejea l Museum de Gherdëina 50 ani. L assessëur provinziel ala cultura ladina Florian Mussner y l’assessëura ala cultura tudëscia Sabina Kasslatter Mur tulerà pert a chësta festa. Sun 50 ani de mpëni per l patrimone culturel de Gherdëina rujenerà nce l ntendënt Roland Verra. La festa ai 7 de agost scumëncia dala 6 da sëira tla Cësa di Ladins a Urtijëi. n dumënia ai 8 de agost uniral tenì n di dla porta davierta cun zachei che spiega i pec dl museum, relazions, juesc per mëndri y mujiga.
as
