Atualità
De plu mutons y mutans, ma la medema cumpëida de personal pedagogich tla scolines ladines
USP – Tla scolines dla val Badia y de Gherdëina iel per l autonn unì tëut su 46 mëndri de plu permez a setëmber dal ann passà. Tla scolines ladines saral per la ann de scola 2010/11 de ndut 749 mutans y mutons. A duta la families che à damandà na luegia ti iel unì dat na puscibltà. I mutons y la mutans ruva for plu jëuni te scolina.
Sun 749 mutans y mutons che à ti luesc ladins giapà na luegia te scolina iel me plu 17 sun lista de aspitanza. Chësc fej ora l 2,2%. “A uni familia ti iel unì dat la puscibltà de na luegia. Vel un ëssa messù jì tl luech ujin y dantaldut pra i plu pitli à i genitores mpomo ulù se i tenì a cësa i lascian sun lista de spitanza” spiega la diretëura Hannelore Insam. De fauré ova i cunsëies dla singula scolines cialà la cumpëides che n ie boni de tò su per l proscimo ann de scolina. Ntlëuta fova mo 31 sun la lista de aspitanza. La cumpëida de maestres y culaburadësses pedagogiches ie restedes unfat nce cun n aumënt de 46 mituns y mitans . “Ulon nce cun chësta cumpëida de mutons y mutans garantì cualità dl lëur pedagogich tla scolina. La gestion dl personal se damana n gran lëur de urganisazion, che vën fat chisc dis. Chësc dantaldut por la truepa stieres a mez tëmp che vën damandedes dales educadësses. Mplù muessel unì cunscidrà avisa la frecuënzes danmesdì y domesdi te uni singula scolina" nsci l’ispeturia Edith Ploner. Ti majeri luesc sciche Urtijëi y La Ila ie mo vel un che aspieta plu gën sun na luegia mpede jì tl luech ujin ala scolina. Sun 11 scolines dla Val Badia ie me doves che à na lista de aspitanza. A Corvara per ejëmpl an nchinamei pudù pité lerch a vel mënder che vën uni di menà da Fedom ca.
Per l proscimo ann de scola iel tla 17 scolines ladines cun 35 sezions, udù dant 84,5 stieres per persones che lëura diretamënter cun i mëndri: 40 maestres y 38 culaburadësses pedagogiches. Leprò ruvel mo 3 stieres da maestres per l’integrazion y 3,5 stieres per culaburadësses per l’intergrazion. Duta chësta stieres ie resservedes ala grupa de rujeneda ladina, tan inant che l sarà personal cualificà a disposizion.
as
