Atualità
Zircunvalazion de S.Crestina vën nuzeda de plu che n se ëssa aspità
USP - N ann do che l ie unì giaurì la streda de zircunvalazion a S.Crestina mostra la cumpëides di auti che la vën nuzeda de plu che n se ova aspità tla proietazion. Sëuraprò ai auti y mesuns pesoc che passa via l luech, vën na gran pert dl muvimënt a se l dé da chëi che furnea ite y ora de S.Crestina. Purempò passa feter 2/3 de dut l muvimënt tres la zircunvalazion. “N media passa 5.700 auti al di tres la zircunvalazion y nia plu danter la cëses de S.Crestina, chësc cumporta n gran miuramënt dla cualità de vita tl zënter” spiega l assessëur Florian Mussner.
L muvimënt sun la zircunvalazion de S.Crestina muda dassënn danter l fin dl’ena y via per l’ena. Ntan la sajon turistica iel i dis de festa unì arjont na mesaria de feter 8.600 mesuns al di, via per l’ena na cumpëida n mesaria de 6.600 mesuns che ie furnei te tramedoi direzions. Ora de sajon ie la cumpëides sambën scialdi mëndres: i dis de festa 3.700 mesuns (spartii sun 24 ëura) y via per l’ena feter 3.900 mesuns. La streda de zircunvalazion à na lunghëza de 1.700 metri cun cin puenc y doi tuniei. Chësta cumpëides reverda l prim tunel a unì da Urtijëi ite, tlamà “tunel Monte Pana”.
Tl “tunel Saslong” iel feter la medema cumpëides, me i dis de festa ntan la sajon iel te chësc tunel stat 2,7% manco muvimënt che depënd bonamënter dal purtoi dai schi Saslong che ie danter i doi tuniei. Nce danter la doi direzions dl muvimënt sun streda, de viers de Sëlva o de Urtijëi, iel me na pitla defrënza.
Ntan chësc prim ann che la streda de zircunvalazion de S.Crestina ie davierta an nce pudù furné do la vedla streda. Tla proietazion oven fat cont che feter mesa la cumpëida de duc i mesuns tulerà la streda nueva. “Aldò de sciazedes y dla cumpëides sun la zircunvalazion udons śën che feter 2/3 dl muvimënt ne passa nia plu tres l zënter de S.Crestina” spiega l ing. Georg Fischnaller, proietant dla zircunvalazion. Chësc vel canche l zënter dl luech ne ie nia śarà ai auti. Ti ani passei oven fat cumpëides tl raion de “La Poza” riesc do la sëida danter S.Crestina y Sëlva. Tenian cont che te Gherdëina ie la cumpëides sun streda aumentedes de 2% al ann, vëniel per l ann 2010 stimà che da “La Poza” passa 8.000 mesuns al di (n mesaria). Feter 2/3 de chisc ie unic cumpedei sun la zircunvalazion de S.Crestina, plu avisa tl tunel Saslong.
L turism te nosta valedes cumporta che de sada iel la majera cumpëides sun streda. Nsci ie nce la majera cumpëides de dut l ann unides arjontes ntan la sades de jené y fauré cun passa 11.300 mesuns al di. Ai 13 y 27 de fauré ie passei plu de 13.200 mesuns. “Messon se nmaginé sce duc chisc auti fossa passei tres la streda Dursan, tl zënter de S.Crestina” sotrissea l assessëur provinziel Mussner.
as
