Atualità
Museum Ladin dedichea l merdi ala geologia dla Dolomites
USP – L Museum Ladin Ciastel de Tor mët a jì n culaburazion cun l Parch naturel Puez-Odles uni merdi ntan l instà n di dedicà ala geologia dla Dolomites. Chësta pruposta à abù gran nteres.
L merdi danmesdì spiega l paläontologh Herwig Prinoth la basa teorica sun l’evoluzion dla Dolomites cun na prejentazion tres computer, ejëmpli y esperimënc. Domesdì se anconten cun l jëuf de Börz y va pona a pe de vieres de Putia. Sun chësc troi possa i vijitadëures se fé n cheder dla furmazions plu mpurtantes dla Dolomites. Da udëi iel tlo dantaprima la tiera cuecena “Grödner Sandstein”, la furmazions de Bellerophon (250 milions de ani) che testemunieia l majer murì de tieres. La majera mprescion fej aldò de Prinoth i parëies de Putia che ie de Dolomit de Sarl y dl Scilier. Do la jites ie feter 40 vijitadëures plën de entusiasm. La majera pert ne se ëssa nia aspità che la storia dla Dolomites fossa tan nteressanta, nsci la respostes dla jënt.
N merdi che vën, 31 de agost saral l’ultima jita de chësc instà. Nfurmazions plu avisa giaten sun la plata internet dl Museum ladin www.museumladin.it o cherdan su l 0474 524020.
as
