Atualità
Ladins pra l Festival dla mendranzes de Aosta
USP – Tla Val D’Aosta se anconta dai prim ai trëi de setëmber reprejentanc de plu mendranzes dl’Europa per n barat culturel y aministratif. L Assessorat culturel dla Region Aosta à chëst ann nvià l Assessorat ladin dla Provinzia de Bulsan a reprejenté la grupa de rujeneda ladina pra l “Festival des Peuples minoritares”.
Tla Val d’Aosta cunviv de plu mendranzes che rejona l Patos, l Franzëus y la rujenedes Walser. La region se pieta sciche luegia adateda ulache mendranzes de duta l’Europa possa se ancunté y se paredlé a livel culturel y aministratif. Chësta idea vën chëst ann inò cuncretiseda tla segonda edizion dl “Festival des Peuples minoritares”. Ntan trëi dis uelen mëter mpe n forum de cunfront sun la problematiches dla mendranzes, analisé dificulteies dla cumenanzes minoriteres y cuntribuì a chësta maniera a la creazion de na nueva Europa di populi. “Deberieda ulons nes judé y sustenì danter la istituzions per na politica che mantën y cura la identiteies” spiega l assessëur Florian Mussner.
L Festival ie fat su sun trëi seves: forum, mujiga y film. Tl forum uniral tenì cunferënzes y descuscions cun aministradëures, storics, scritëures y prufessëures. Dla defrënzes cultureles y l mantenì dla identiteies tla nueva Europa di populi rujenerà nce pea Alexander Prinoth, diretëur dla repartizion provinziela per Scola y cultura ladina. L forum dl segondo di ie dedicà a esperienzes di populi minoriteres danter cultura y defrënzes. Per i ladins rujenerà tlo l ntendënt Roland Verra. Ai 3 de setëmber, pra l ultima descuscion dl festival uniral tratà manieres y strategies per se ancunté danter mendranzes. L assessëur Florian Mussner rujenerà tlo deberieda cun l’ assessëur culturel aostan Laurent Viérin, l presidënt dl zënter dla mendranzes etniches CIEMEM dla Catalogna Aureli Argemi y l vizepresidënt dl “Quimper Comunità” dla Bretagna Pierre Le Berre.
L program de mujiga gëura la prima sëira la grupa rock “The Pëufla” de Urtijëi, i autri dis sunerà grupes dla Bretagna, dla Val d’Aosta y dla Catalogna. Danter forum y sëira de cunzerc pieta l festival uni di nce films de stories de vita tla mendranzes. Bele l prim di, uniral per la mendranza ladina mustrà l film “Ie jive méfun” de Ingrid Demetz de S.Crestina.
as
