Atualità
Kasslatter Mur damanda de mëter adum la unions di Schützen
USP – “La vela dl cumandant nuef de duc i Schützen de Südtirol y de chël dl Tirol ie na bona ucajion per pensé a na union danter Schützen de ca y de la dl Prëner” dij l’assessëur ala cultura Sabina Kasslatter Mur. L’assessëura nvieia i Schützen a numiné n sëul cumandant per l Tirol y per l Südtirol.
L muvimënt di Schützen, nasciù tres l “Tiroler Landlibell” dl 1511, reprejentea de plën l’unità storica y culturela dl Tirol, sotrissea l’assessëur Kasslatter Mur. La veles dl cumandant di Schützen dl Südtirol ie ududes dant d’auril de n auter ann. Trëi mënsc dant muessa l cunsëi de si bënsté ala lista di candidac. L cumandant di Schützen dl Tirol vën lità ti proscimi mënsc.
L ie tler che l ne sarà nia tan scëmpl a mëter adum la doi lies provinzieles, dij l’assessëura, ma śën iel n bon mumënt per se fé n pensier. “Sce ne se nfidon nia a svilupé vijions che semea te n prim mumënt vaghedes, ne ruvons nia inant cun la region europea dl Tirol” dij Kasslatter Mur. Sëuraprò ala medema tradizion dla defendura dl Tirol, iel bele śën na culaburazion sterscia sun deplù ciamps danter i Schützen de dl Tirol a sud, nord y est. Danter auter vëniel dat ora deberieda la zaita „Tiroler Schützenzeitung“.
Avisa 60 ani dala fundazion dl “Bund” dla cumpanies dl Tirol y 52 ani do la nascita dl “Südtiroler Schützenbund” cun sustëni dal Tirol dl nord y dl est, iel aldò dl’assessëura unì l mumënt per na tel union. “L avëi n cumandant deberieda danter Tirol y Südtirol dajëssa n cialé ora al’unità y fossa n var de viers dla region europea Tirol” dij Kasslatter Mur, che uel nia se mescedé tla cumpetënzes di Schützen, ma plu che auter purté dant n’idea da pensé do.
as
