Atualità
Finà via l stritoz per Ötzi – sëurandat l cumpëns
USP – L stritoz per l cumpëns de avëi abinà Ötzi ie ncuei (30 agost) finà via de fin. L presidënt dla provinzia Luis Durnwalder à sëurandat al aucat de chëi che ova abinà la mumia, Georg Rudolph, n scech simbolich de 175.000 euro. Chësta ie la soma de cumpëns che fova unida fata ora danter i arpadëures dla copia Simon y la Provinzia de Bulsan.
La storia ie deventeda cunesciuda: de setëmber 1991 ova la copia de Nürnberg Helmut Simon y si fëna Erika udù la mumia fajan na jita sun l Hauslabjoch te Schnals y ti ova pona cuntà de chësta al ost dl utia. L corp ne fova nia de n alpinist, ma de na mumia de dlacier vedla passa 5000 ani. Na sensazion archeologica.
Tosc do avëi abinà la mumia fova unì ora n stritoz per l cumpëns per la copia Simon. “Da pert dla Provinzia oven n iede pità 10 milion de lires, na soma che ie pona do y do unì aumenteda” dij L presidënt Durnwalder. Purempò ne iesen nia ruvei a una. „Sëuraprò al cumpëns se ova i Simon damandà na pert de duta la ntredes, publicazions y chëutes che taca adum cun Ötzi zënza ne ulëi judé a paië l mantenimënt” spiega Durnwalder.
Ajache n fova d’autra minonga ala durà belau 20 ani nchin che la Provinzia ie ruveda a una cun i arpadëures de Helmut Simon (che ie mort ntant). L ie unì fat ora n cumpëns de 175.000 euro. Ani de stritoz ie finei via ncuei cun la sëurandata simbolica dla soma al aucat Rudolph. “L ie stat n troi lonch y plën de sasc che fina ncuei y śën ie dut a post” à dit Rudolph ncuei tl palaz Widmann a Bulsan. Nce per Durnwalder ie l finé via de chësc stritoz n var mpurtant: “śën saral finalmënter pesc per l avëi abinà Ötzi”.
as
