Atualità
Jonta provinziela: streda da tractor sun Antersasc
USP – Te si prima senteda do la paussa da instà à la Jonta provinziela de Bulsan ncuei (6 setëmber) tëut posizion sun de plu cuestions che ie ultimamënter states argumënt de descuscion. Da pont de ududa dla populazion ladina nteressea dantaldut la streda de Antersasc, che aldò dla Jonta dëssa me unì nuzeda cun n tractor. Ai 21 de nuvëmber saral veles de Chemun a Corvara. L presidënt dla provinzia à riesc do la senteda prejentà de plu argumënc te na cunferënza stampa.
Streda sun Antersasc
Tla situazion atuela danter lëures fermei dala suneria y n proiet dat pro, à la Jonta provinziela detlarà che la streda de Antersasc dëssa me unì nuzeda da tractors y avëi na larghëza aldò. I assessëures à delibrà che la Forestela provinziela dëssa cialé tres l proiet y prejenté prupostes alternatives. I tecnics dëssa nce di sce l ie l cajo de mudé trassa per la pert che ie mo da fé. Dala Forestela se aspieta la Jonta provinziela nce prupostes per na regulamentazion dl nuzé dla streda. “Sun Antersasc dëssa me pudëi furné su l patron o chël che lëura l luech” à dit Durnwalder.
Veles de Chemun a Corvara
A Corvara uniral ai 21 de nuvëmber lità l cunsëi de chemun. Do la veles de mei de chëst ann ne foven nia ruvei a una per mëter su na Jonta de Chemun y nsci muessel unì lità da nuef. Ai 5 de lugio ova la Jonta provinziela nciarià Heinrich Huber cun l duvier de cumisser particuler per aministré l Chemun de Corvara nchin ala proscima veles.
Tofles di troies da mont
Duta la Jonta provinziela ie stata a una sun si posizion per via dla tofles di troies da mont. I prinzipies di assessëures ne ie nia mudei. La lies da mont dëssa se tenì ai inuemes aldò dl Cataster, per talian, tudësc y ladin. La paroles che spiega n inuem dëssa unì scrites te plu rujenedes tantosc che la tofles ie sun puscion publica. Inuemes per talian che vën adurvei dassënn dëssa unì sëurantëuc sun la tofles. “La traduzions strambes de Tolomei ne dëssa nia unì tëutes n cunsciderazion” à dit Durnwalder te cunferënza stampa. N cont dla pertenduda dl minister Raffaele Fitto de baraté ora la tofles iel unì dit che l lëur muessa unì fat te n tëmp realistich, tenian cont dl lëur y dl custimënt. Ulà che l ie puscibl dëssel unì adurvà zifres y pictograms. La Jonta provinziela se mbincia dala lies da mont CAI y AVS che i se mueve sun na linea unitera.
Ciastel de Ehrenburg
La Provinzia ne cumprerà nia l ciastel de Ehrenburg. “Ne cumpron nia ajache te chësc mumënt ne ons degun bujën de utilisazion” à dit l presidënt dla Provinzia. Dan feter 15 ani oven abù tratatives ajache n adurvova na luegia per l museum de ciacia. “Ne cumpron nia cie che ne adurvon nia” à dit Durnwalder. L ciastel ie sota defendura de ensamble y ne possa nia unì frabicà ntëur. Sce l patron, de Puster, uel vënder vel pertes o vel mubilia, muessel damandé la Provinzia.
Deguna dopla-ncëries
La Jonta provinziela à stlarì la pert dl pruposta per la lege omnibus ulache n pudova nterpreté che politics da dant pudëssa tò su dopla ncëries. L pert fova unì fata per se adaté a na lege naziunela n cont de plu ncëries, ma chësta lege naziunela ie ntant sun ntervënt dla suneria costituzionela nia plu n drova. Acioche l ne vënie nia ora nterpretazions fauzes à al Jonta śën nciarià si aucac de scrì chësta pert dla pruposta de lege da nuef y plu tlera.
Statut dl ECO-Center
Te na reunion staordinaria dëssa l ECO Center unì trasfurmà te na sozietà defin publica y l ne ie nsci nia plu debujën de scrì ora uni lëur. Aldò dl statut nuef dat pro te Jonta dëssel mpede 50 cumëmbri, pudëi fé pert duc i 116 chemuns dla provinzia. Tl cunsëi de aministrazion dëssel ruvé ite doi reprejentanc di chemuns, doi dl chemun de Bulsan y un dla provinzia. Te na reunion ordinera dëssel unì tëut na dezijion sun l mplant de biogas a Lana. Per l mplant da brujé l paltan a Tramin dëssel mo dant unì laurà ora na pruposta che possa unì metuda a votazion.
Posizion sun monumënc fascisć
Sun dumanda di Schützen à la Jonta provinziela tëut posizion sun i monumënc fascisć tla Provinzia de Bulsan. Plu gën ëssen che chisc monumënc unissa tëuc demez y che i ne vën nia adurvei da muvimënc politics. Zaré ju l monumënt ala vitoria ne sarà nia realistich. L ne à degun bert a tò demez vel pertes. Plu che auter se n magina i assessëures che l dëssa dé da pensé y che l dëssa unì nterpretà ala drëta maniera. La sief dëssa unì tëuta demez y la tofles de spiegazion dëssa unì metudes su daujin. Tla cripta dëssel unì fat n museum che spiega l somëter dl fascism y dl sozialism naziunel. “I jëuni dëssa pudëi mparé cie che chisc rejims estremes à fat” à dit Durnwalder. I relieves sun l palaz dla finanza a Bulsan dëssa unì tëuc demez ajache i cumporta na pruvocazion. L ne fossa nia uman a desdrù i ossares sun la sëides provinzieles. “Messon avëi respet da uni persona, unfat sce l rujenova rus, polach o tudësch” à dit l presidënt dla provinzia. I ossares ne daussa nia unic adurvei politicamënter, i dëssa resté y giapé la tofles de spiegazion. L monumënt dl alpino sun la plaza Kapuziner a Burnech dëssa unì spustà te n raion militer, canche la plaza unirà fata da nuef. N cont dla toponomastica iel unì laurà ora na pruposta de lege che tën cont di inuemes tl Cataster, di inuemes taliani nravisei y di inuemes tramandei storicamënter. N cialerà de purté inant chësta posizion te uni ucajion ajache l juda a n cunviver dla grupes de rujeneda tla pesc.
as
