Atualità
Lege dla reforma dla scola auta va duman n drova
USP – Una dla majera reformes purtedes inant dala Jonta provinziela de Bulsan, la regulamentazion nueva dla scola auta va n drova duman mierculdi 29 de setëmber. La lege provinziela ie ncuei unida publicheda tla gazëta ufiziela dla region.
La lege provinziela publicheda sun la gazëta ufiziela dla region (edizion 39 dl 28.09.2010) ie unida dateda cun l 24 de setëmber 2010 y à l numer 11. La lege sun la reforma dla scola auta jirà n drova cun duman mierculdi.
L fin dla reforma ne ie nia me l adatamënt dl sistem scolastich ala reforma statela per la scoles autes, ma sëuraprò de mantenì la cumpetënzes autonomes y “de nvië via n sistem che tën cont di bujëns di sculeies y dla families, ma nce dla particulariteies dla Provinzia” coche sorissea i assessëures provinziei ala scola.
L sistem nuef ie fat su sun trëi seves: la furmazion tl gymnasium, la scoles tecniches y la scoles prufesciuneles. Ulà che la defrënta sortes de scoles autes unirà pitedes sarà na dezijion dla Jonta Provinziela sun la basa l plann de spartizion. Cun la reforma dla scola auta iel unì metù la fundamënta per pudëi mëter n drova l sistem nuef scumencian cun l proscimo ann de scola. I prim ejams de scola auta do reforma dëssa unì fai l ann 2015.
as
